بنجائی وزیر محسن نقوی نا چین نا سفیر جیانگ زی ڈونگ تون اوڑدہی، کراچی دھماکہ ٹی 2 چینی شاری تا زوال آ ڈکھیائی و است ہسونی نا درشان

اسلام آباد۔ 07 اکتوبر (اے پی پی) بنجائی وزیر داخلہ محسن نقوی چین نا سفیر جیانگ زی ڈونگ تون اوڑدہی کرے و کراچی دھماکہ ٹی 2 چینی شاری تا زوال کننگ آ ڈکھیائی و است ہسونی نا درشانی ءِ کرے۔ دوشنبے نادے آ بنجائی وزیر داخلہ سید محسن نقوی چینی سفارت خانہ غا ہنا و چینی سفیر تون اوڑدہی کرے۔ بنجائی وزیر محسن نقوی چین نا سفیر، حکومت و زوال کروک آ چینی باتی تا خاہوت آتون پورو یکجہتی نا درشانی ءِ کرے۔ بنجائی وزیر داخلہ محسن نقوی چینی سفیر ءِ دھماکہ نا غٹ سرجم و جاست وپاست اٹی پیش رفت نا بارواٹی معلومدار کرے۔ بنجائی وزیرپارے کہ ڈکھیائی نا ساہت اٹی چین نا حکومت و زوال کروک آ شاری تا خاہوت آتون تفوک اُن، مچ  آپاکستانی قوم تینا چینی ایلم تا غم اٹی بریبر نا شریک ءِ، واقعہ نا جوان جاست وپاست ءِ پک کرسا دااست ہسون سانحہ ٹی اوار زموار آتے قرارواقعی سزاتننگک۔ اوپارے کہ پاکستان چین سنگتی آ جلہو ناقابل سگ ءِ، دابرادرانہ تعلقداری ءِ نسخان تننگ نا گندہ سازش اسے، لغور دشمن نا داسازش ءِ اسُل سرسہب مننگ کن الیپنہ، پاکستان نا شونداری کن کاریم کروک آ چینی ایلم تا رکھ اولیت ءِ۔ اوپارے کہ چینی شاری تیا جلہو نا اخس کہ مذمت ءِ کننگے کم ءِ، دشمن پاکستان نا بھاز  پت انا قابل سنگت ملک انا شاری تے شست کرے، داجلہو چینی شاری تیا آخا بلکن پاکستان آٹی ءِ۔ اوپارےکہ دشمن ءِ دا جلہو نا سکت ورندی تننگک۔