صدر مملکت آصف علی زرداری نا آل پارٹیز کانفرنس آن تران

اسلام آباد۔ 07 اکتوبر (اے پی پی) صدر مملکت آصف علی زرداری ڈیہہ اٹی ودوک آ اسرائیلی مہم جوئی و بے چیٹی ٹی ودکی آ گڑتی نا درشانی ءِ کرسا جہانی برادری آ زور شاغانے کہ او امن نا بحالی و جھیڑہ غاتے تالانی آن توننگ کن دمدستی گام گیج کے۔ صدر مملکت داخیال آتا درشانیءِ دوشنبے نادے آ داڑے ایوان صدر اٹی حکومت نا کنڈآن بٹنگوک آ  آل پارٹیز کانفرنس آن تران کرسا کرے ہرادے فلسطین اٹی اسرائیل نا بربریت نا اسہ سال اس پورو مننگ نا وخت آ اڈتننگاسس۔ اوپارے کہ تدوک آ اسہ سال اٹی اسرائیلی کوزہ گیر فوج انفراسٹرکچر ءِ بھس کننگ آن بیدس 41800 فلسطینی تے شہید کرے۔ دیوان اٹی وزیراعظم شہباز شریف ، چیئرمین سینیٹ سید یوسف رضاگیلانی، بنجائی کابینہ نا باسک آک، مسلم لیگ (ن) نا صدر محمد نواز شریف، پیپلزپارٹی نا چیئرمین بلاول بھٹو زرداری ، جے یوآئی (ف) انا سروک مولانا فضل الرحمان ، جماعت اسلامی نا امیر حافظ نعیم الرحمان و ایلو سیاسی جماعت آتا راہشونک بشخ ہلکر۔ صدر مملکت پارے کہ اسرائیل لبنان ، شام و یمن ءِ شست کننگ کن تینا جلہو آتے ودفنگ تون اوار اوار علاقائی و جہانی امن وسلامتی ءِ خطرہ ٹی شاغانے۔ اوداہیت آ است ہسونی نا درشانی ءِ کرے کہ جہانی برادری اسرائیل ءِ خاص وڑاٹ غزہ ٹی فلسطینی آبادی نا برخلاف نسل کشی کننگ آن توننگ اٹ بے سہب مسنے، و دااستثنیٰ نا ساڑی حالیت آتیا ہم سوج ہرفینے۔ صدر آصف علی زرداری پارےکہ جہانی برادری کن دا بھاز المی ءِ کہ او بے چیٹی تے کم کننگ  و پین جون تا زیان و جھیڑہ غاتے ڈیہہ اناایلو بشخ آتیٹی تالانی آن توننگ کن دمدستی کارروائی کے۔ اواقوام متحدہ نا سلامتی کونسل آ ہم زور شاغا کہ او فلسطینی و لبنان اٹی امن وسلامتی نا قیام نا تینا زمواری تے پورو کے و 1967 آن مست انا سیم تا بنداو آ اسہ آجو فلسطینی ریاست اسے نا جوڑ کننگ ہرانا دارالحکومت القدس مرے، نا کمک اٹ اِراریاستی ایسری کن پاکستان نا دہائی تیا متکن موقف نا درشانی ءِ کرے۔ صدر مملکت زور شاغساپارے کہ فلسطین نا ویل ءِ اقوام متحدہ نا سلامتی کونسل نا قرارداد آتا رداٹ ایسر کننگ آن بیدس دے ٹک نیامی ٹی امن مننگ کپک۔ فلسطین آن اسرائیلی فوج انا پورو کشنگ نا خواست کرسا اواقوام متحدہ نا سلامتی کونسل آن خواست کرے کہ او دے ٹک نیامی ٹی امن نا بحالی کن اسرائیل ءِ جہانی کانود نا خلاف ورزی آن پاناد تخے۔ صدر مملکت مقبوضہ بیت المقدس تون اوار مقبوضہ عرب علاقہ غاتیان اسرائیلی فوج انا پورو کشنگ و فلسطینی الس نا ناقابل تنسیخ حق خودارادیت نا بحالی ناپاکستان  نا موقف نا درشانی ءِ کرے۔