غزہ ٹی اسرائیلی جارحیت و خونریزی ءِ دمدستی چٹفنگ اولیت ءِ، وزیراعظم شہباز شریف نا آل پارٹیز کانفرنس آن تران

اسلام آباد۔ 07 اکتوبر (اے پی پی) وزیراعظم محمد شہباز شریف غزہ ٹی اسرائیلی جارحیت وخونریزی نا دمدستی چٹفنگ ءِ اولیت گوندسا پارینے کہ کودک فلسطینی تا برخلاف ظلم و بربریت آ جہانی ضمیر بایدے بش مرے، پاکستان نا حکومت جہانی کہول آ اسرائیلی ظلم ءِ بے نقاب کننگ و فلسطین نا ویل انا ایسری نا اہمیت ءِ تالان کننگ کن چاہندار آتیا تالان ورکنگ گروپ اس ٹہیفک، پاکستان فلسطینی الس ءِ انسانی ہمدردی امداد نا فراوانی ٹی پین ترندی اتیک و فلسطینی طالب علم آتے پاکستان نا کالج ویونیورسٹی تیٹی داخلہ تننگک۔ داخیال آتا درشانی ءِ او دوشنبے نادے آ داڑے ایوان صدر اٹی یوم یکجہتی فلسطین  نا بابت اڈ ہلوک آل پارٹیز کانفرنس آن تران کرساکرے۔ وزیراعظم محمد شہبا زشریف پارے کہ صدر نا کنڈآن داکانفرنس اٹی بشخ ہلنگ آ غٹ راہشون تا منت وار اُٹ، مچ آ پاکستان آن سیاسی و مذہبی زعماء تا مچی داہیت انا شاہدی ءِ کہ ہراتم کہ پاکستان ءِ چیلنج اس مون تروک مس ، چائے او تہہ یا پیشن نا چیلنج مرے، مچ آ سیاسی و مذہبی سرکڑدہ غاک یکجا مسر و اسہ توار مرسا نئے بیرہ تینا جوزہ غاتا درشانی ءِ کریر بلکن پبی سلاہ پیش کریر و اودے عملی دروشم اس تننگ کن پبی کمکاری نا درشانی ءِ کریر۔ اوپارے کہ داکانفرنس اٹی اجتماعی دانش نا درشانی ءِ کننگا، چندی سلاہ پیش کننگا۔ غٹ سیاسی و مذہبی جماعت آک تینا موقف ءِ پبی وڑاٹ پیش کریر، دا اجتماعی سوچ و فکر ننا غٹ اکن است بڈءِ، کانفرنس اٹی جہانی دنیا نا کڑد انا بابت ہیت کننگا و پاننگاکہ عالم اسلام ءِ بایدے مون آ برے و عملی گام گیج کے۔ اوپارے کہ قرارداد پاکستان و قائداعظم نا فکر انا بابت ہیت کننگا و پاننگاکہ نن فلسطین نا آجوئی نابایدے ہیت ءِ کین۔ اوپارے کہ القدس الشریف نا دارالخلافہ نا حامل آزاد فلسطینی ریاست نا جوڑ کننگ نا بابت کانفرنس اٹی بشخ ہلوک آتیٹی امنائی سلاہ خننگک۔ اوپارے کہ مچ آپاکستانی قوم فلسطینی تیا بدترین ظلم و خونریزی نا مذمت ءِ کیک، فلسطینی چناو زالبول آتے شہید کننگ انگ ءِ، مچ آ شار بھس مس، بھارت نا غیرکانودی کوزہ ٹی جموں و کشمیر اٹی ہم حالیت آک زیات جتا افس، وادی کشمیر اٹی کودک کشمیری تا دتر ءِ وہیفنگ انگ ءِ، وادی کشمیر ظلم و بربریت نا سوب دتراٹ خیسن مسنے۔ اوپارےکہ سوڈان نا بشخنگ، دے ٹکی تیمور نا باندات آتے طے کننگ کن جہانی واکدار آک غٹ چم آتے کاریم اٹ ایسُر۔انت مسلمان تا دتر اوفتا دترآن اڑزآن ءِ۔ اوپارے کہ اینو جہانی ضمیر بایدے بش مرے، 40 ہزار آن زیات فلسطینی شہید مسنو، چوری چناک تینا لمہ و باوہ نا خون آ آہ و بکاہ کننگ ءُ، دنیا نا مون آ است ہسون واقعہ غاتے میڈیا مون آ اتنگ ءِ، داخونریزی  ءِ بند کننگ کن نن غٹ واکدار آک بایدے مچ مرین۔ او پارے کہ دنیا ءِ داباندات آ قائل کننگ کن کانفرنس اٹی ہرا سلاہ تے پیش کننگانے اوفتیان متفق اُٹ، فلسطینی تا خونریزی ءِ بند کرفنگ اولیکو فرض ءِ و داڑکن ننے اوآئی سی نا پلیٹ فارم آن توار بڑزکروئی مریک، داکانفرنس اٹی اسرائیلی ظلم انا برخلاف قرارداد منظور کرفنہ و ورکنگ گروپ اس جوڑ کینہ ہراکہ چاہندار آتیا تالان مریک و دادے دنیا نا اہم ملک آتیا گدریفنگک  ہرانئے بیرہ پاکستان بلکن عالم اسلام نا مسلمان تا پبی کلہو ءِ سرکیک و دنیا ءِ معلومدار کیک کہ دا ظلم و زیاتی ءِ اسُل است آن دننگ مفک و ٹھپ آک اسُل جوڑ مفسہ، دابابت دمدستی گام گیج کینہ، آستانہ نا دورہ ٹی فلسطین نا ویل و کشمیر نا ویل انا بابت پاکستان موقف تالان کریسس، اقوام متحدہ ٹی ہم داباندات آ عالم اسلام خاص وڑاٹ پاکستان نا موقف ءِ پبی وڑاٹ تالان کرے و اقوام متحدہ نا سلامتی کونسل نا دیوان آن واک آؤٹ کرین۔ اوپارےکہ غٹ آن مست جنگ بندی وخت ان اہم انگا گرج ءِ داڑکن نن بایدے پبی توار بڑز کین و دادے مون آ دننگ کن اقوام متحدہ تون اوار ہرجہانی فورم آ بایدے ہرفن۔  اقوام متحدہ ٹی مسلمان خاص وڑاٹ پاکستانی تا جوزہ غاتا عکاسی ءِ کرینے و داوخت آ آئی ایم ایف تون پروگرام اٹی ہم سرسہبی ملا۔ اوپارے کہ ننے مسلمان و مظلوم قوم تا موقف ءِ پورو یکسوئی ، واک، سیوت و سخا اٹ بیان کروئی ءِ، ننے ملک ءِ شونداری نا کنڈآ دروئی ءِ، نیزگاری و بے روزگاری ءِ چٹفوئی ءِ، ننا توار ءِ دنیا ٹی ہمووخت آ خف توننگک ہراتم نن تینے اواری اٹ قوم اس جوڑ کینہ۔ اوپارے کہ فلسطینی تے امدادی گڑاتا فراوانی ءِ پک کننگانے، داٹی پین ودکی کینہ، فلسطینی صدر محمود عباس تون اوڑدہی مس، اوفلسطینی تیکن پبی توار بڑز کننگ آ حکومت پاکستان و پاکستانی الس نا منت واری ءِ ہرفے، ننے عملی پڑاٹ فلسطینی تیکن بھاز گڑاکروئی ءِ، چوری مروک آ فسلطینی مار ومسن تیکن خاص کر میڈیکل نا تعلیم نا بست و بند کرینن، سد آ طالب علم دانگیا بریرہ، پاکستان نا سرکاری و نجی کالج و یونیورسٹی تیٹی اوفتا داخلہ غاتا بست وبند ءِ کننگک، داجوان ءُ سلاہ سے۔ اوپارے کہ داکانفرنس اٹی پبی قومی یکجہتی نا شاہدی ءِ تننگا، کانفرنس نا فیصلہ غاتیا ترندی اٹ عملدرآمد کننگک، دعا ءِ اللہ تعالیٰ فسلطین اٹ خونریزی ءِ بند کرفنگ اٹ ننا کمک ءِ کے و فلسطین ءِ آجوئی عطاکے۔