اوغانستان نا بیان پاکستان نا تہہ نا باندات آتیٹی ناقابل قبول و قابل مذمت نیام تمنگ ءِ، ترجمان دفترخارجہ

اسلام آباد۔ 07 اکتوبر (اے پی پی) پاکستان اوغانستان نا وزارت خارجہ نا بیان آ سخت ردعمل ظاہرکرسا اودے پیدوار وڑاٹ مسترد کرینے۔ دفترخارجہ نا ترجمان ممتاز زہرہ بلوچ دوشنبے نادے آ داڑے تینا بیان اٹی پارےکہ اوغانستان نا بیان پاکستان نا تہہ نا باندات آتیٹی ناقابل قبول و قابل مذمت نیام تمنگ ءِ۔ اوپارےکہ اوغانستان نا عبوری حکومت اسہ جمہوری ملک اسے آ لیکچر تننگ نا جاگہ غا تینا ملکی ویل آتے تینٹ ایسر کننگ ، شمولیت ءِ اولیت تننگ آ بایدے چکار کے، و مذہب نا گمراہ کن تشریح نا جاگہ غا زالبول و مسن تیکن تعلیم نا حق اتون اوار تینا مخلوق نا گرج و است خواہی تیکن بایدے جوابدہ مرے۔ ترجمان پارے کہ اوغانستان نا عبوری حکومت دہشت گرد ٹولی تے جاگہ تننگ آن انکارکرسا جہانی برادری تون کروک آ قول آتے بایدے پورو کے، ہرا ہمسایہ ملک آتیٹی امن و سلامتی ءِ بھاز خطرہ غاتا گواچی کننگ ءُ و داکہ اودے اوغانستان ءِ اسہ وار ولدا جہانی دہشت گردی سے نا مرکز مننگ آن تورے۔ اوپارے کہ پاکستان ڈیہہ اٹی امن، مذاکرات وکمکاری کن سنبرینگوک ءِ و اوغانستان تون اوار غٹ ریاست آتیان دا اومیت تخک کہ او زموارانہ جہانی طرز عمل و بین الریاستی تعلقداری نا بنداوی اصول آتا پاسداری ءِ کیرہ۔