کراچی دہشت گرد جلہو قابل مذمت، چینی وپاکستانی زہمی تا خاہوت آتون ہڑزخواہی و ہمدردی نا درشانی ءِ کینہ، ترجمان دفترخارجہ

اسلام آباد۔ 07 اکتوبر (اے پی پی) پاکستان تدوک آ نن کراچی بالی پٹ نا خڑک آ مروک آ دہشت گردانہ جلہو نا ترندی اٹ مذمت ءِ کیک ہراٹی اِرا چینی انجینئر آتا جون تا زیان و اسٹ اس ٹھپی مس۔ ترجمان دفترخارجہ نا کنڈآن دوشنبے نادے  آجاری بیان اٹی پاننگانے کہ نن چینی و پاکستانی زہمی تا خاہوت آتون تینا ہڑزخواہی وہمدردی نا درشانی و ٹھپی تا زوت دراخ جوڑی کن دعا کینہ۔ بیان نا رداٹ دہشت گردی نا ناناپاک کارروائی نئے بیرہ پاکستان آ بلکن پاکستان وچین نا پائیدار سنگتی آ ہم جلہو اسے، نن مجید بریگیڈ تون اوار دا جلہو نا زموارآتے عدالت نا مون آ اتنگ کن سنبرینگوک اُن۔ ترجمان تینا بیان اٹی مستی پارے کہ پاکستان نا سیکورٹی و کانود نافذ  کروک آ ادارہ غاک ڈوہدار و اوفتا کمکار آتے ہرحال اٹ ہلیرہ و داکاریم نا مرتکب سزاغان بچنگ کپسہ، وزارت خارجہ کوآرڈینیشن کن چینی سفارت خانہ تون خڑکی رابطہ ٹی ءِ۔ بیان نا رداٹ پاکستان وچین خڑکی شریدار و آہنی ایلم ءُ ہرا تین پہ تینی شرف و اسیجا مقدر نا بندھن اٹی تفوک ءُ۔ ترجمان پارےکہ پاکستان چینی شاری، ڈٹ وپاکستان اٹ ادارہ غاتا رکھ و سلامتی کن تینا بدل مفروک عزم انا درشانی ءِ کیک و دہشت گرد واکدار آتے شکست تننگ کن تینا چینی ایلم تتون اواری اٹ کاریم کرساکیک ۔