کانسٹیبل عبدالحمید شاہ ءِ شرپسند آک شہید کریر، شہید نا اسہ مار اسے پولیس اٹی ملازمت و شہداء پیکج نا رداٹ پلاٹ ہم تننگک، محسن نقوی

اسلام آباد۔ 06 اکتوبر (اے پی پی) بنجائی وزیر داخلہ محسن نقوی پارینے کہ کانسٹیبل عبدالحمید شاہءِ شرپسند آک شہید کریر، پولیس کارندہ نا کسفنگ اٹی اوار بندغ آتا برخلاف سخت کارروائی کننگک، شہید نا اسہ ماراسے پولیس اٹی ملازمت و شہداء پیکج نا رداٹ اسہ پلاٹ اس ہم تننگک۔ شنبے نادے آ پی ٹی آئی نا برانزی مچی کروک آتا دوتے اٹ بیدادی نا شست مروک آ پولیس کانسٹیبل عبدالحمید شاہ شہید نا نماز ءِ جنازہ ءِ خواننگ آن پد میڈیا تون گپ وتران کرسا وزیرداخلہ پارےکہ عبدالحمید نا جون ءِ بچفنگ کن ہرممکن کوشست کننگا، شہید عبدالحمید شاہ نا وارث آتا ڈکھیائی ٹی بریبرنا شریک اُن، کانسٹیبل عبدالحمید شاہ ءِ شرپسند آک شہید کریر، پولیس کارندہ نا کسفنگ اٹ اوار بندغ آتا برخلاف سخت کارروائی کننگک، داواقعہ ٹی اوار اسٹ اسے ہم بشخنگ پننگک۔ وزیرداخلہ پارے کہ شہید انا اِرا مار ءُ، اسٹ سی ڈے اے ٹی ملازمت کیک اودے آخبتی کینہ، اسٹ ءِ پولیس اٹی ملازمت تننگک، شہید ناخاہوت آتے شہداء پیکج نا رداٹ اسہ پلاٹ اس ہم تننگک، داکاریم ءِ پورو کرسا زوت اوفتے اوفتا دستاویز آتے تننگک۔ وزیرداخلہ پارےکہ وزیراعلیٰ خیبرپختونخوا علی امین گنڈاپور ننا حراست اٹی اف، اونئے تو پولیس و نئے پین ادارہ سے نا تحویل اٹی ءِ، پولیس چھاپہ غان مست ہی وزیراعلیٰ علی امین گنڈاپور پیش تماسس نراسس، وزیراعلیٰ خیبرپختونخوا کے پی ہاؤس اٹی ساڑی اف۔ پولیس اونا دزگیری کن ناکہ بندی کرینے، چھاپہ غان مست علی امین نراسس اونا عکس آک ہم ساڑی ءُ۔ اسہ سوج اسے نا ورندی ٹی اوپارے کہ وزیراعلیٰ ءِ اسلام آباد پولیس پٹنگ اٹی ءِ۔ اوپارےکہ درملکی شاری تا برخلاف کارروائی کینہ۔