عطاء اللہ تارڑ نا لمہ گودی ساجدہ فاروق تارڑ نا گورنمنٹ گرلز پرائمری اسکول کوٹ لکھپت نا دورہ

لاہور۔ 02 اکتوبر (اے پی پی) بنجائی وزیر حوالکاری و شینکاری عطاء اللہ تارڑ نا لمہ گودی ساجدہ فاروق تارڑ چارشنبے نادے آ حلقہ این اے 127 نا یوسی 224 اٹی واقع گورنمنٹ گرلز پرائمری اسکول پنڈی راجپوتاں کوٹ لکھپت نا دورہ ءِ کرے و اسکول نا بست وبند آتا جاچ ءِ ہلک۔ کوآرڈی نیٹر ویمن ونگ این اے 127 رابعہ افضل، پرسنل سٹاف آفیسر ٹو بنجائی وزیر حوالکاری وشینکاری شہباز طالب و صدر ویمن ونگ پی پی 162 مہوش ارشد ئسک ہم اوڑتون اوار ساڑی ئسر۔ گودی ساجدہ فاروق تارڑ اسکول نا چندی کلاس آتا وزٹ ءِ کرے و چناتتون گپ وتران کرسا پارے کہ نم خواری اٹ تعلیم دوئی کبو انتئے کہ خواری اٹ ہی سرسہبی دوئی مریک۔ داوخت آ اسکول نا ہیڈ مسٹریس کشور سلطانہ عطاء اللہ تارڑ نا لمہ ءِ اسکول نا ویل آتیان معلومدار کرے و اسکول اٹی ضرورت آتا کمتی ءِ دمدستی وڑاٹ ایسر کننگ نا خواست کرے۔ گودی ساجدہ فاروق تارڑ اسکول اٹی فرنیچر نا کمتی آ گڑتی نا درشانی ءِ کرے و داکمتی ءِ پورو کننگ و ایلو ویل آتے ایسر کرفنگ نا باوری کرفے۔ داکان مست گودی ساجدہ فاروق تارڑ نا بننگ آ چناک پھل انا پتی خسسا اودے بخیرکریر۔ مسکوہی چیئرمین یوسی 224 چوہدری رانا بابر، وائس چیئرمین یوسی 224 عبدالستار بٹ، تنویربخاری سیکرٹری عمر سہیل ضیابٹ، انوارحسین کونسلر یوسی 224، پارٹی ورکرادیبہ عظمت و رانا عنصر ئسک ہم داوخت آ ساڑی ئسر۔