وزیراعظم محمد شہباز شریف تون پنی آ اسلامی اسکالر ڈاکٹرذاکر نائیک نا اوڑدہی، ذاکر نائیک اسلام نا سہی کلہو ءِ مخلوق اسکان سرکرسا اسہ بھاز اہم ءُ فرض اس سرتننگ اٹی ءِ، وزیراعظم

اسلام آباد۔ 02 اکتوبر (اے پی پی) وزیراعظم محمد شہباز شریف تون پنی آ اسلامی اسکالر ڈاکٹر ذاکر نائیک اوڑدہی کرے۔ داوخت آ وزیراعظم پارے کہ اسلام امن نا دین ءِ و ذاکر نائیک اسلام نا سہی کلہو ءِ مخلوق اسکان سرکرسا اسہ اہم ءُ فرض اس سرتننگ اٹی ءِ۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پاکستان آبننگ آ ڈاکٹر ذاکر نائیک ءِ بخیر کرسا پارے کہ امت مسلمہ نے آ ناز کیک کہ نی مچ آ دنیا ءِ اسلام نا سہی دروشم آن روشناس کرفیس، داہیت بھاز ستاکڑزک کہ نا بنوک آتیٹی اسہ بھلو کچ اس ورناتا ءِ۔ وزیراعظم پارے کہ ای نا لیکچرآتے بھاز شونق اٹ بنیوہ ہراکہ بھاز پرمغز و تاثیر آن پُرمریرہ۔ وزیراعظم پارے کہ کنے دابھاز خوشی مس کہ نا مار ہم ناگام تیا چلینگ انگ ءِ و دین اسلام نا خذمت ءِ کننگ اٹی ءِ۔ وزیراعظم 2006اٹی ڈاکٹر ذاکر نائیک تون تینا اولیکو اوڑدہی نا ہم ذکر ءِ کرے۔ داوخت آ گپ وتران کرسا ڈاکٹر ذاکر نائیک پارے کہ ای 1991 ٹی پاکستان نا اولیکو دورہ ءِ کریسٹ و داسکان اونا یات آک تازہ ءُ۔ ڈاکٹر ذاکر نائیک پارے کہ پاکستان دنیا نا اسٹ انگا ملک ءِ ہرا اسلام نا پن آ جوڑ مس۔ اسلام اسہ پورو ضابطہ حیات ءِ ہراننے ہرباندات اٹی راہشونی فراوان کیک۔ وزیراعظم پارے کہ اگہ نن اسلام نا کسر آ چلینگنہ تو سرسہب مرینہ، کنا ہندا مشن ءِ کہ مچ آ دنیاٹی اسلام نا کلہو ءِ عام کیو۔ ڈاکٹر ذاکر نائیک وزیراعظم ءِ معلومدار کرے کہ او اسلام آبادآن بیدس کراچی و لاہور اٹی ہم لیکچرایتک۔ وزیراعظم ڈاکٹر ذاکرنائیک کن نیک است خواہی نا درشانی ءِ کرے۔ ڈاکٹر ذاکرنائیک پارے کہ اینو کناپاکستان آ بننگ  نا است خواہی پورو مس ہراڑآ بھاز خوش اُٹ، پاکستان دنیا نا نقشہ غا اسٹ انگا ملک ءِ ہرا اسلام نا پن آ جوڑ مس، پاکستان نا الس نا اسلام تون بھلو تعلقداری اسے، اینو اللہ کنا است خواہی ءِ پورو کرے و ای پاکستان نا اولیکو سرکاری دورہ غا بسونٹ، داڑآ ای پاکستان نا حکومت نا منت وار اُٹ ہراکنے بٹنگا۔ اوپارے کہ پاکستان نا اسہ خاص ءُ درجہ اسے، پاکستان نا چندی شار تا دورہ ءِ کیوہ، عالم دین تتون اوڑدہی مریک و پبلک لیکچر ایتیوہ۔