صدر مملکت آصف علی زرداری نا سول ایوی ایشن نا کزیتی  ملازم نا مار انا تقرری ناپارت

اسلام آباد۔ 02 اکتوبر (اے پی پی) صدر آصف علی زرداری پاکستان سول ایوی ایشن اتھارٹی ءِ پارت کرینے کہ او کزیتی ملازم نا مار انا تقرری ءِ اسہ تُو انا تہہ ٹی کانود نا رداٹ کے۔ ایوان صدر نا پریس ونگ انا رداٹ فہیم احمد(غاو کروک) پاکستان سول ایوی ایشن اتھارٹی نا برخلاف ‘‘کزیتی ملازم’’ نا کوٹہ غا تقرری کپننگ نا غاو کریسس۔ درخواست گزار نا رداٹ اونا باوہ پی سی اے اے نا ملازم ئس و اونا کزیت سروس اٹی 1999 ٹی کینسر نا سوب آن مس ۔ چونکہ اوہمووخت آ نابالغ ئس، ہنداخاطرآن او ‘‘کزیتی ملازم’’ کوٹہ غا تقرری کن اہل الوکہ۔ ہراتم وئی پورو مننگ آ نوکری کن درخواست تس تو بیدس سوب آن اونا درخواست ءِ مسترد کننگا۔ درخواست گزار تینا غاوانا ازالہ کن پاکستان سول ایوی ایشن اتھارٹی تون رابطہ کرے ولے ہموکان ہم دادرسی مننگ کتو۔ اوکان پد فریشانی ٹی تینا غاو انا ایسری کن بنجائی محتسب تون رابطہ کرے۔ محتسب فیصلہ کرے کہ غاو تروک پی اے سی سی نا برخلاف بدانتظامی نا مقدمہ اس جوڑ کننگ اٹ بے سہب مسنے انتئے کہ اونا درخواست نا وخت فیملی اسسٹنس پیکج لاگو الوکہ۔ اوکان پد غاو کروک صدر آ محتسب نا پرمان نا برخلاف درخواست دائرکرے۔ تینا فیصلہ ٹی صدر مملکت پارےکہ غا و کروک نا باوہ نا مدت ملازمت اٹی 1999ٹی چٹا و ہمووخت آدرخواست گزار نا وئی بیرہ شش سال ئس۔ 2005 نا پالیسی نا رداٹ وئی پورو مننگ آن پد تقرری کن درخواست تسوسس، اوکان پد کزیتی ملازم نا مارءِ اشتہار نا رسمی کارروائی آن گدرینگ انگ آن بیدس ہمومحکمہ ٹی تعیناتی کن سجفوئی ئس۔ صدر مملکت پی سی اے اے نا دا دعویٰ ءِ مسترد کرے کہ او 2005 اٹی فیملی اسسٹنس پیکج نا پالیسی ءِ تیناکریسس و دمدستی کیس اٹ راستکی و کانودی پوزیشن نا سوب آن ہندا پیکج نا دفعہ غاک سجفنگ نا قابل الورہ۔ صدر مملکت پیدواری کرے کہ سول ایوی ایشن اتھارٹی نا دعویٰ ساڑی آ کیس انا حالیت آتیٹی کانودی وڑاٹ درست اف انتئے کہ درخواست گزار سرکاری نوکری کن وئی نا حد پورو کننگ آن مست تعینات مننگ نا اہل الوکہ۔ اوپارے کہ داپالیسی نا ممکنہ اطلاق نا باندات ءِ نئے کہ پالیسی نا مسکوہی اطلاق نا باندات ءِ۔ صدر مملکت سول اپیل نمبر 2020/410مورخہ 02/06/2021اٹی سپریم کورٹ آف پاکستان نا فیصلہ غا ہم سیبو کرے۔ ہنداسوب آن صدر مملکت غاو تروک آنا درخواست ءِ منظور کرسا سول ایوی ایشن اتھارٹی ءِ پارت کرے کہ او اسہ تُو انا تہہ ٹی کانود نا رداٹ تقرری کن اونا درخواست آ کارروائی کے۔