وزارت داخلہ شنگھائی کمکار تنظیم سروکی دیوان نا وخت آ فول پروف سیکورٹی ءِ پک کننگ کن لائحہ عمل نا منظوری ءِ تس

اسلام آباد۔ 02 اکتوبر (اے پی پی) وزارت داخلہ برجاتُو اسلام آباد اٹی اڈہلوک شنگھائی کمکار تنظیم (ایس سی او) سروکی دیوان نا وخت آ فول پروف سیکورٹی ءِ پک کننگ کن لائحہ عمل نا منظوریءِ تسنے۔ ایس سی او کانفرنس اٹی پاک فوج، رینجر، ایف سی و پنجاب پولیس نا ودکی نفری ہم تعینات کننگک۔ چارشنبے نادے آ بنجائی وزیر داخلہ محسن نقوی ناکماشی ٹی شنگھائی کمکار تنظیم سروکی دیوان نا تیاری تا بابت دیوان اڈ ہلک ہراٹی بنجائی سیکرٹری داخلہ، ایڈیشنل سیکرٹری، چیف کمشنر اسلام آباد، آئی جی پولیس اسلام آباد، ڈپٹی کمشنر اسلام آباد، ڈپٹی کمانڈنٹ ایف سی، سیکٹر کمانڈر پاکستان رینجرز و سیکورٹی ادارہ غاتا نمائندہ غاک بشخ ہلکر۔ دیوان اٹی ایس سی او سروکی دیوان نا بابت سیکورٹی بست وبند آتا سرجمی اٹ جاچ ءِ ہلنگا۔ وزیرداخلہ محسن نقوی پارےکہ برجاتُو شنگھائی کمکار تنظیم ناسروکی دیوان نا پاکستان اٹ اڈ تننگ بھاز اہمیت تخک۔ سمٹ اٹی کیہی سروک مملک آک بشخ ہلنگ اٹی ءُ، جہانی کانفرنس ناپاکستان اٹ اڈتننگ مچ آ قوم اکن شرفمندی نا سوب ءِ۔ اوپارےکہ ایس سی او سروکی کانفرنس ناوخت آ فول پروف بست وبند آتے ہرکہول آ پک کننگک۔ ایس سی او کانفرنس نا وخت آ اسلام آباد ءِ زیبا جوڑ کننگک و سفائی نا خاص بست وبند کننگک ۔ اوپارےکہ ایس سی او دیوان اٹی غٹ تعلقدار ادارہ غاک تین پہ تینی کمک اٹ تینامتعین کروک کڑد ادا کیر، غٹ ءِ تین پہ تینی کمک اٹ دااہم سروکی کانفرنس ناپرامن و سرسہب اڈتننگ ءِ پک کروئی ءِ۔