وزیراعظم محمد شہباز شریف نا کبینی نا کچ 44 تُو انا کم انگا کہول آ بننگ آ اظہار تشکر ، آئی ایم ایف پروگرام نا بناغان زرگزران اٹی پین سوگوی بریک، وزیراعظم

اسلام آباد۔ 01 اکتوبر (اے پی پی) وزیراعظم محمد شہباز شریف کبینی نا کچ 44 تُو انا کم انگا کہول آ بننگ آ منت واری نا درشانی ءِ کرسا پارینے کہ آئی ایم ایف پروگرام نا بناآن زرگزران اٹی پین سوگوی بریک۔ وزیراعظم کبینی نا ستمبر نا تُو اٹی سالانہ کچ 6.9 درسد مننگ آحکومت نا زرگزرانی ٹیم انا پذیرائی کرینے۔ اگست 2024 اٹی 34 تُو اٹی اولیکو وار پاکستان اٹ کبینی نا کچ 9.6 درسد آبس، ستمبر 2024 اٹی تدوک آ 44 تو اٹی کبینی نا کم انگا کچ 6.9 درسد ریکارڈ کننگا۔ سے شنبے نادے آ وزیراعظم آفس نا میڈیا ونگ آن جاری کروک بیان نا رداٹ اللہ نا فضل و کرم اٹ الس تون کروک آ قول انا پاسداری ٹی سرسہبی ملنگ بناکرے۔ وزیراعظم محمد شہباز شریف پارے کہ کبینی نا کچ 6.9 درسد مننگ آن لس بندغ ءِ ریلیف ملک، پیٹرولیم مصنوعات آتا نہاد آتیٹی ہم پدریسہ کمتی آن الس ءِ ریلیف مننگ ءِ۔ اوپارے کہ شرح سود کم مننگ آن ملک اٹی کاروباری سرجزآتیٹی ودکی مریک، کبینی نا کچ ءِ 2025 اسکان 7 درسد اسکان اتنگ نا ہدف نا 2024 اٹی ہی دوئی کننگ ستاکڑزک۔ اوپارے کہ اولیکو دے آن السی ریلیف کن گام گیج آتے اولیت کرین، پاکستان نا ڈیفالٹ نا است خواہی کروک آتا ڈٹ بے سہب مس، مچ آ قوم تدوک آ سال تیٹی اسہ گروہ اسے نا نابودی نا سوب آن مشکل کاٹ کریر، ملکی زرگزران سوگو، سفارتی تعلقداری سوگو و لس بندغ ءِ شونہالی نا سفر بناکرینے، آئی ایم ایف پروگرام نا بناغان زرگزران اٹی پین سوگوی بریک۔ وزیراعظم پارے کہ پاکستان نا شونداری نا سفر 2018 ء ٹی ہراڑے سلیسوسس، ہموکان دُوارہ بناکرینے۔