صدر آصف علی زرداری نا بزرگ انگا بندغ آتا جہانی دے آ کلہو

اسلام آباد۔ 01اکتوبر (اے پی پی) صدر مملکت آصف علی زرداری بزرگ شاری تے تینا آزموندہ وپامداری ورناچین ءِ گدریفنگ و ملکی شونداری وشونہالی ٹی کڑد ادا کننگ آ خراج تحسین پیش کرسا پارینے کہ بزرگ بندغ آتا جہانی دے انا وخت آ نن بزرگ بندغ آتیکن نگہداشت و خیالداری نا نظام ءِ گچین کننگ کن تینا عزم انا درشانی ءِ کینہ۔ صدر مملکت داخیال آتا درشانی ءِ بزرگ بندغ آتا جہانی دے انا وخت آ تینا کلہو اٹی کرے ہرا سے شنبے نادے  یکم اکتوبر آ اڈتننگ انگ ءِ۔ اوپارے کہ بزرگ شاریک نئے بیرہ ننا راج انا بنداو ءُ بلکن او علم ، حکمت و آزموندہ نا منبع ہم اریر، ننا مذہب ننے تینا لمہ و باوہ و بزرگ آتون مہرومریبت و شفقت اٹ پیش بننگ نا درس ایتک۔ صدر مملکت پارے کہ ننا لمہ وباوہ و بزرگ چناتا پرورش اٹی وخت، مہرومریبت، توانائی و وسیلہ غاتا دروشم اٹ بے پناہ قربانی ایترہ، داننا اخلاقی و مذہبی زمواری ءِ کہ نن اوفتے تون عزت و شرف اٹ پیش برین و پیری ٹی اوفتاخیال ءِ تخن۔ صدر مملکت پارے کہ اسلامی جمہوریہ پاکستان نا آئین ریاست آ دازمواری ءِ بیٹ کیک کہ اوہمو غٹ شاری تیکن زند انا گرج آتے فراوان کے ہرا نزوری، ناجوڑی و بے روزگاری نا سوب آن آخبتی یا عارضی وڑاٹ تینا روزی ءِ کٹنگ آن قاصر ءُ۔ اوپارے کہ پاکستان بزرگ شاری تا راجی آسودہی کن چندی گام گیج کرینے، ہندن ہندن مخلوق نا عمر ودک او ایلوفتیا سیبو خوارہ و اوفتے خصوصی خیالداری نا زیات گرج مریک، ہنداسوب آن ننا بزرگ آتے اڑزان طبی آسراتی اسکان رسینگ تننگ المی ءِ ۔ صدر آصف علی زرداری پارے کہ ای بنجائی وزیر و صوبائی حکومت آتون اوار اوار سول سوسائٹی آن خواست کیوہ کہ او گچین جان جوڑی نا آسراتی ءِ اولیت ایتر، راجی رکھ ءِ جوان کیر، بزرگ آتا حق انا رکھ ءِ کیر و اوفتے اسہ دوستانہ و جان جوڑچاگڑد اس فراوان کیر۔ اوپارے کہ اینو نا دے، ببو پاکستان ءِ پین جوان و بزرگ دوست ملک اس جوڑ کننگ نا کوشست کین۔