سیکرٹری خارجہ آمنہ بلوچ نا انسٹی ٹیوٹ آف سٹریٹجک سٹڈیز اٹی جہانی کانفرنس آن تران

اسلام آباد۔ 01 اکتوبر (اے پی پی) سیکرٹری خارجہ آمنہ بلوچ پاکستان نا آثارقدیمہ و تہذیبی میرات نا رکھ و اوفتے پین مون آ دننگ نا گرج آ زور شاغساپارینے کہ ملک انا پبی و کثیر الجہتی تاریخی و تہذیبی میرات گمر ناسوب ءُ۔ داخیال آتا درشانی ءِ او داڑے انسٹی ٹیوٹ آف سٹریٹجک سٹڈیز(آئی ایس ایس آئی) نا کنڈآن ’’پاکستان ناآثارقدیمہ و تہذیبی میرات‘‘ نا سرحال آ جہانی کانفرنس آن تران کرسا کرے۔ کانفرنس اٹی سفارتکار، دودوربیدہ ئی چاہندار و تعلیم نا چاہندارآک بشخ ہلکر۔ ایسری سیشن آن تران کرسا سیکرٹری خارجہ آمنہ بلوچ ملک انا پبی و کثیرالجہتی میرات آ تینا گمر نا درشانی ءِ کرے۔ اوپارےکہ وادی سندھ و گندھارا نا قدیم تہذیب آک ساڑی آ پاکستان اٹ شون ہلکنو۔ سیکرٹری خارجہ آثارقدیمہ و تہذیبی میرات نا رکھ انااہمیت آ زور شاغسا پارینے کہ دا متکن آ دودوربیدہ غاتیٹی جدت ، لچک و بقائے باہمی نا قدرآک اینوہم ساڑی ءُ۔ اوسیل و سوات و شونداری کن متوازن نقطہ نظر ءِ تینا کننگ ناذکر ءِ کرساپارے کہ پاکستان نا دودوربیدہ ئی میرات بروک آچین تیکن رکھوک مرے۔ اوداسرحال آ چکار کننگ نا انسٹی ٹیوٹ آف سٹریٹجک سٹڈیز(آئی ایس ایس آئی) نا گام انا ستاءِ کرے۔ سیکرٹری خارجہ باوری کرفے کہ دفترخارجہ داکوشست آتیٹی اسہ سنبرینگوک اسٹیک ہولڈر و شریدار اس مریک و پاکستان نا اسیجائی میرات نا رکھ و مون آدننگ کن ہندی کمیونٹی و جہانی چاہندار آتون اواری اٹ کاریم کیک۔ داکان مست بنائی دیوان آن سینیٹر مشاہد حسین سید و بنجائی سیکرٹری قومی میرات و دودوربیدہ حسن ناصر جامی ئسک ہم تران کریر۔