نیویارک ۔27ستمبر (اے پی پی): مزن وزیر محمد شہباز شریف ءَمیاں اوستمانی برات آنی گوما یکجائی ھمک رنگیں ناشرکاری مقابلہ ءِ جزم ءِ درشان ءَ کنان ءَ گوشتگ کہ ناشرکاری ءِ میاں اوستمانی کوکا ءِ گہتری ءِ ضلورت انت، ادارکی حکومت ءَ را اوگانستان ءِ توک ءَ توامیں ناشرکاری گروپ ھاسیں رنگ ءَ ھمساھگیں ملک آنی ھلاپ ءَ سیم سر ءَ چہ آدیم ناشرکاری ءِ زمہ وار آناں بے اسر کنگ ءِ واستہ جوانیںکاروائی کنگ لوٹ ائیت۔ آدینگ ءِ روچ ءَ یونائیٹڈ نیشن ءِ جنرل اسمبلی ءَ گوں گشتانک دیان ءَ آئیءَ گوشتگ کہ بیست سالءَ چہ پاکستان ناشرکاری ءَ گوں دلیریں ءَ ءُ کامیاتی ءَ گوں مقابلہ ءَ کنت ءَ انت، پاکستان ءِ اندر ءَ ناشرکاری گروپ آناں شکست داتگ۔ ما ناشرکاری ءِ ھلاپ ءَ جنگ ءَ ٹوھیں قیمت داتگ، مئے 80 ہزار دلیریں ارد ءُ الس شہری آناں شہید کتگ ایشانی تہءَ سکول ءِ کودکیں زھگ ھوار انت۔ مئے معیشت ءَ را 150 ارب ڈالر ءِ تاوان بوتگ۔ آئی ءَ گوشت کہ بد بھتیءَ چہ مرچی مارا یک رند ءِ پد ءَ ھاسیں رنگ ءَ ٹی ٹی پی درئی ناشرکاری ءُ ایشی ءِ کارندہ آنی نیمگ ءَ چہ ڈنی مالی کمک ءُ سروک ءِ گوما ناشرکار آنی گوما دیم پہ دیمی انت۔ ما وتی راجی کوشست ءُ جزم ءِ برجائی ءِ وسیلگ ءَ یک رند ءِ پدا اے ھوپ ءِ ھلاسی ءِ و استہ جزمیگ آں ءُ ما میاں اوستمانیبرات آنی گوما یکجائی ءَ ھک رنگیں ناشرکاری ءِ گوما مقابلہ ءَ کناں ءُ ناشرکاری ءِ میاں اوستمانی کوکا ءِ گہتری کاراں۔ آئیءَ گوشت کہ پاکستان اوگانستان ءَ جاور آناں زوتاں زوت شر بوھگ ءِ واھشت ائیگ انت۔ ما لکھانی بزگیں اوگان آنی واستہ یونائیٹڈ نیشن ءِ 3 ارب ڈالر ءِ بنی آدمی کمک ءِ واستہ دزبند ی ءِ لڑ ءَ ھوار آں۔ مزن وزیر ءَ گوشت کہ ما اے میاں اوستمانی اوست آناں شیئر ءُ ایشانی برجائی ءَ کنان ءَ اوگان ادارکی حکومت زالبول ءُ زھگ آنی ھک ءُ سیاسی ھواری ءِ دیمروئی ءَ ھوار بنی آدمی ھک آنی شرپ ءَ کناں۔ ھاسیں رنگ ءَ ادارکی حکومت ءَ را اوگانستان ءِ اندر ءَ توامیں ناشرکاری گروپ آنی ھلاپ کاروائی ترند کنگ لوٹ ائیت۔ ایشانی تہءَ داعش، القاعدہ ءَ گوں نزیکیں ٹی ٹی پی/ درئی ناشرکار مجید بریگیڈ ءُ بی ایل اے ءُ ایندگر ھوار انت۔
