نیویارک۔ 27 ستمبر (اے پی پی) وزیراعظم محمد شہباز شریف پنی آپاکستانی امریکن بینکرآتے ملک اٹی انفراسٹرکچر، توانائی، ٹیکنالوجی، کشت وکشار نا بشخ آتیٹی زرکاری نا سلہ ءِ خلسا درملکی زرکارآتا آسراتی کن سوگو میکرواکنامک چاگڑد ءِ برقرارتخنگ کن حکومت نا عزم انا درشانی ءِ کرے۔ وزیراعظم آفس نا پریس ونگ انا کنڈآن جاری اعلامیہ نا رداٹ وزیراعظم محمد شہباز شریف تون اقوام متحدہ جنرل اسمبلی نا 79می دیوان نا وخت آپنی آپاکستانی امریکن بینکرآتا ڈل اوڑدہی کرے۔ ڈل اٹی جے پی مورگن، نیٹیزس کارپوریشن اینڈ انویسٹمنٹس، سومیٹو مومٹسوئی بینکنگ کارپوریشن، گولڈمین سیچس سٹیزنزبینک، لیزارڈ، آوڈیکس گروپ تون اوار پنی آ بینک آتا نمائندہ غاک اوار ئسر۔ اوڑدہی ٹی وزیراعظم ڈل ءِ زرگزران نا سوگوی و پاکستان اٹ درملکی زرکاری ءِ اتنگ کن حکومت ناکنڈآن کروک آ گام گیج آتیان معلومدار کرے ہرافتے ٹی خراج بیس نا ودفنگ، کاروباراٹی آسراتی و مون آ دننگ وسرکاری ادارہ غاتیٹی برجااصلاحات اوار ءُ۔ وزیراعظم پارے کہ حکومت نا گام گیج آتیٹی زرگزرانی ٹک آتیٹی گچینی بسنے، و جہانی ریٹنگ ایجنسی بشمول فچ و موڈیزنا کنڈآن پاکستان نا کریڈٹ ریٹنگ اٹی ودکی مسنے۔ اوڈل ءِ اسہ پائیدار مالیاتی فریم ورک اسے نا جوڑ کننگ نا بارواٹی ہم پارے ہرا حکومت ءِ جہانی کیپٹل مارکیٹ آتیٹی گرین/سسٹین ایبلٹی بانڈ انا جاری کننگ اٹ کمکار مریک ۔ وزیراعظم نا منت واری ءِ ہرفسا ڈل حکومت نا پالیسی تا ستاءِ کرے ہراپاکستان اٹ زرگزرانی سوگوی نا دوئی کننگ اٹ اہم کڑد ادا کننگ اٹی ءِ۔ ڈل برآمد آتے مون آ دننگ اٹ کمک کن مینو فیکچرنگ سیکٹر خاص کر ایس ایم ایز نا شونداری کن حکومت تون کمکاری ٹی بھاز است خواہی نا درشانی ءِ کرے۔ وزیراعظم محمد شہباز شریف امریکی بینک آتے پاکستان اٹ انفراسٹرکچر ، توانائی، ٹیکنالوجی و کشت وکشار نااہم بشخ آتیٹی زرکاری کننگ ناسلہ خلک و درملکی زرکارآتا آسراتی کن سوگو میکرواکنامک چاگڑد ءِ برقرارتخنگ کن حکومت نا عزم انا باوری ہم کرفے۔
