نیویارک۔ 27 ستمبر(اے پی پی) وزیراعظم محمد شہباز شریف پارینے کہ پاکستان نا زرگزران نا غٹ بشخ آتیٹی امریکی زرکاری ءِ اتنگ حکومت نا اولیت ءِ کاروبار اٹی آسانی کن آسودہی فراوان کننگ آ چکار کننگ اُن، خصوصی زرکاری سہولت کونسل نا جوڑ کننگ نا مسخت زرکارآتا پت اٹی ودکی، ویل آتا دمدستی ایسر و کمکاری نا کمک اٹ ڈٹ آتیا عمل درآمد ءِ ترند کننگءِ۔ اوداخیال آتا درشانی ءِ تدوک آ دے اقوام متحدہ نا جنرل اسمبلی نا 79 می دیوان اٹی بشخ ہلنگ کن تینا دورہ ءِ نیویارک اٹی امریکہ پاکستان بزنس کونسل نا ڈل آن تران اٹی کرے ۔ داوخت آ کونسل نا صدر و ایلو بڑزکو عہدیدار و امریکہ نا کارپوریٹ انٹرپرائزز نا سروک آک ہم ساڑی ئسر۔ وزیراعظم پاک امریکہ واپاری وزرکاری تعلقداری تے پین ودفنگ نا بابت پارےکہ پاکستان نا زرگزران نا غٹ بشخ آتیٹی امریکی زرکاری ءِ اتنگ حکومت نا اولیت ءِ، حکومت پاکستان کاروبار اٹی آسراتی تا فراوانی آ چکار کرینے و دا چرجوئی ٹی کارپوریٹ حلقہ غاتا سلاہ تے اولیت تننگ انگ ءِ۔ بشخ ہلوک آتے خصوصی زرکاری سہولت کونسل تون درستی راستی کرفسا وزیراعظم داہیت آ زور شاغا کہ ایس آئی ایف سی اسہ بڑزکو کہول انا ون ونڈوایجنسی اسے ہرا درملکی زرکارآتے چاراہم بشخ، کشت وکشار، انفارمیشن ٹیکنالوجی، توانائی، و کانڑکنی ٹی ڈٹ سازی و عملدرآمد نا بابت آسراتی فراوان کننگ ءِ۔ وزیراعظم پارے کہ ایس آئی ایف سی نا مسخت زرکارآتا پت اٹی ، ویل آتا دمدستی ایسر و سہولت کاری نا کمک اٹ ڈٹ آتیا عملدرآمد ءِ ترند کننگ ءِ۔ وزیراعظم پارے کہ پاکستان نا زرگزران نا چندی بشخ خاص کر کشت وکشار، فن ٹیک، دواجوڑکننگ، تیل و گیس و کانڑ کنی تون اوار ٹیکنالوجی سیکٹر ناپیدواری ءِ کرے ہراڑے امریکی کمپنیک حکومت نا پالیسی تیان فائدہ ہرفنگ کیرہ و تین پہ تینی وڑاٹ فائدہ ئی ڈٹ آتا بناءِ کننگ کیرہ۔ دیوان اٹی پاکستان اٹی امریکی زرکارآتا سینئر نمائندہ غاک بشخ ہلکر ہرافتے ٹی سینئر نائب صدر و انٹرنیشنل یوایس چیمبر آف کامرس نا سروک جان مرفی، ایگزیکٹیو ڈائریکٹر ایشیا، صدر امریکہ پاکستان بزنس کونسل ایسپرانز اجیلالیان، ایکسلریٹ انرجی نا صدر و چیف ایگزیکٹیو آفیسر اسٹیون کوبوس ، پیپسی کو، ایکسیلیریٹ انرجی، ٹی آرجی پاکستان، ماسٹرکارڈ،پی اینڈ جی، ایلومینا و ایبٹ نا سینئر نمائندہ غاک اوار ئسر۔ امریکہ پاکستان بزنس کونسل نا صدر ایسپرانزاجیلالیان تینا ریمارکس اٹی پارے کہ پاکستان امریکی زرکاری کن سازگار ءُ ہند اسے، و دابابت بھلو کچ اس ساڑی ءِ ۔ اومستی پارے کہ کونسل نا ڈل انا پاکستان نا دورہ زوت آتے اٹی گمانی ءِ و دادورہ ٹی زرکاری نا پین وارخواہی پٹنگ نا موقع ملک۔ اوکان پد امریکی کاروباری کمپنی تا نمائندہ غاک وزیراعظم تون گپ وتران کریر و وزیراعظم اوفتا چندی سوج آتا ورندی تے ہم تس۔
