نیویارک۔ 27 ستمبر (اے پی پی) وزیراعظم محمد شہباز شریف پاکستان و نیپال نا نیام اٹ کثیر جہتی کمکاری خاص کر واپاری، اقتصادی و سیل و سوات نا بشخ آتیٹی کمکاری ءِ پین سوگو کننگ نا است خواہی نا درشانی ءِ کرینے۔ وزیراعظم آفس پریس ونگ انا کنڈآن جاری اعلامیہ نا رداٹ وزیراعظم محمد شہباز شریف اقوام متحدہ جنرل اسمبلی نا 79 می دیوان نا وخت آ نیپال نا وزیر اعظم کے۔پی شرمااولی تون اوڑدہی کرینے۔ داوخت آ وزیراعظم محمد شہباز شریف کے ۔پی شرما اولی ءِ نیپال نا وزارت عظمیٰ نا منصب ءِ سنبھالنگ آ مبارکبادی تس۔ اوپاکستان و نیپال نا نیام اٹ ہڑتوم آ کنڈآتا تعلقداری آ است جمی نا درشانی ءِ کرسا پاکستانی الس نا کنڈآن نیپال نا حکومت و الس کن نیک است خواہی نا درشانی ءِ ہم کرے۔ وزیراعظم ہڑتوم آ ملک آتا نیام اٹ کثیر جہتی کمکاری خاص کر واپاری، اقتصادی و سیل و سوات نا بشخ آتیٹی کمکاری ءِ پین سوگو کننگ نا است خواہی نا درشانی ءِ کرے۔ وزیراعظم نیپال نا وزیراعظم ءِ پاکستان نا دورہ نا سلہ ہم خلک۔ ہڑتوم آ راہشونک ہڑتوم آ کنڈآتا و علاقائی کمکاری ءِ مون آدننگ نا عزم انا درشانی ءِ ہم کریر۔
