نیویارک۔ 27 ستمبر (اے پی پی) وزیراعظم محمد شہباز شریف غزہ ٹی دمدستی جنگ بندی و ہموڑے رہینگوک فلسطینی تا نسل کشی آ اسرائیل نا احتساب نا خواست انا درشانی ءِ کرینے۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف عراق نا وزیراعظم محمد شیاع السودانی تون اوڑدہی کرے۔ اوڑدہی ٹی ہڑتوم آ راہشونک اقوام متحدہ و اوآئی سی نا پلیٹ فارم آ غزہ ٹی دمدستی جنگ بندی و فلسطینی ایلم تیکن انسانی ہمدردی نا بنداو آ امداد نا بے اڑاند آن فراوانی کن جہانی کہول آ کوشست آتے ترند کننگ نا عزم انا درشانی ءِ کرینے۔ ہڑتوم آ راہشون تا اوڑدہی اقوام متحدہ نا جنرل اسمبلی نا 79 می دیوان نا وخت آ نیویارک اٹی مس۔ داوخت آ وزیراعظم محمد شہباز شریف پاکستان وعراق نا نیام اٹ سوگو تعلقداری تے ستاکڑزوک گوندساپارینے کہ دا تعلقداری تا بنداو تاریخ، دودوربیدہ و مذہب آتا لان ءِ۔ وزیراعظم پاکستانی زائر آتیکن ہرسال کروک آ بست وبند آتیا عراقی حکومت نا کوشست آتا ستاءِ کرے۔ اوڑدہی ٹی ہڑتوم آ راہشونک پاکستان عراق ہڑتوم آ کنڈآتا تعلقداری نا دنگ ءِ پین ودفنگ آ امنا کریر، تین پہ تینی وڑاٹ کمکاری ءِ مون آ دننگ کن ہڑتوم آ ملک آتا نیام اٹ ساڑی کچ آن فائدہ ہرفنگ نا ہم فیصلہ ءِ کننگا۔ ہڑتوم آراہشونک تین پہ تینی است خواہی نا علاقائی و جہانی امور آہم گپ وتران کریر۔ اوغزہ ٹی برجااسرائیلی کشت وخون، ظلم وجور و لکھ آ انسانی زند آتا بھسکاری آ گڑتی ان درشانی ءِ کریر۔ وزیراعظم شہباز شریف پاکستان نا کنڈآن غزہ ٹی دمدستی جنگ بندی و غزہ نا نسل کشی نا اسرائیل ءِ زموار گودنگ نا خواست نا درشانی ءِ کرے۔ جہانی ویل آتیا امنا کرسا ہڑتوم آ راہشونک غزہ ٹی دمدستی جنگ بندی و فلسطینی ایڑھ ایلم تے انسانی امداد نا بے سلنگ آن فراوانی کن اقوام متحدہ و اوآئی سی نا پلیٹ فارم تیا جہانی کوشست آتے پین گچین و ترند کننگ آہم زور شاغار۔
