پاکستان ءِ شاری آبادی ٹی ودکی و چاگڑدی تنزلی نا بھلا چیلنج آک مون تروک ءُ، عبدالعلیم خان

بیجنگ۔ 25 ستمبر (اے پی پی) بنجائی وزیر مواصلات عبدالعلیم خان پارینے کہ سی پیک واپاری راہداریک گرین انرجی و کلین ٹیکنالوجی آ تالان ءُ، ہائی وے و بندرگاہ تے آخب نا گرج آتا رداٹ مربوط کننگک، ٹرانسپورٹ نا بشخ انا اولیت زرگزرانی گچینی، روزگار نا فراوانی و قومی شونداری نا ایجنڈا نامحرک ءِ۔ بنجائی وزیر عبدالعلیم خان چین اٹی گلوبل ٹرانسپورٹ فورم 2024 آن تران کرسا پارے کہ پاکستان ءِ شاری آبادی ٹی ودکی و چاگڑدی تنزلی نا بھلو چیلنج مون تروک ءِ، ہندو برنا ذریعہ اٹ گچینی کن شاری تا رکھ ءِ ہم مون آ تخوئی مریک، سی پیک و چائنہ بیلٹ روڈ ڈٹ آتیان پاکستان وچین ہڑتوم آک فائدہ ہرفرہ۔ بنجائی وزیر پارےکہ پاک چائنا اکنامک کوریڈور(سی پیک) نا رداٹ انفراسٹرکچر و ٹرانسپورٹ نا بشخ آتا گچینی کننگ انگ ءِ۔ عبدالعلیم خان مستی پارے کہ سی پیک نا واپاری راہداریک گرین انرجی و کلین ٹیکنالوجی آ تالانءُ۔ بنجائی وزیرمواصلات پار ے کہ پاکستان نا خلقی علاقہ غاتیٹی غیرمناسب ٹرانسپورٹ سسٹم زرگزرانی دباؤ نا سوب ءِ، ننے ہائی وے و بندرگاہ تے آخبت نا گرج آتا رداٹ مربوط کروئی ءِ، ٹرانسپورٹ نا بشخ انا شونداری نا اولیت نا رداٹ زرگزرانی گچینی، روزگار نا فراوانی و قومی شونداری نا اایجنڈانا محرک ءِ، مواصلاتی نظام اٹ گچینی آن زرگزران بیرہ آخا دودوربیدہ ومعاشرت ءِ ہم فروغ ملک۔ اوپارے کہ کورونا نا دین آن پد ایلو بدلی تیان بیدس گلوبل لاجسٹکس ہم پوسکن ءُ جہت اس اختیارکرینے۔ بنجائی وزیر پارے کہ ای کامرس و ڈیجیٹل وڑوڈول آتا کمک اٹ ٹرانسپورٹ نا بشخ آتیٹی مربوط گچینی مسنے، گلوبل ٹرانسپورٹ فورم آن ٹرانسپورٹ نابشخ ءِ مون تروک ویل آتا پوسکن ءُ ایسر اس پٹنگ اٹ کمک رسینگک۔ بنجائی وزیر عبدالعلیم خان پارے کہ پاکستان مواصلات نا بشخ اٹی پبلک پرائیویٹ پارٹنر شپ و گرین ٹیکنالوجی نا حامی ءِ۔ اوچین نا وزیر ٹرانسپورٹ لی ژیانگ پینگ  نا خصوصی منت واری ءِ ہم ہرفے۔ بیجنگ اٹی مروک آ گلوبل ٹرانسپورٹ فورم آن نیپال و تھائی لینڈ نا نائب وزیراعظم آک ہم تران کریر۔ چین نا وزیر ٹرانسپورٹ لی ژیانگ پینگ گلوبل ٹرانسپورٹ فورم آن تینا تران اٹی پاکستان نامنت واری ءِ ہرفے۔ فورم اٹی آذربائیجان، کمبوڈیا، یونان، کینیا ، کویت ، قطر ، سنگاپور ، تاجکستان و تنزانیہ نا وزیرآک ہم بشخ ہلکنو۔ داکان بیدس چین و پاکستان آن بیدس ازبکستان ، ویت نام و ایلو ملک آتا کمامدارآک کانفرنس اٹی بشخ ہلکر۔