ترک صدر اقوام متحدہ نا جنرل اسمبلی ٹی فلسطین نا ویل ءِ گچین وڑاٹ پیش کرے، حکومت و غٹ ادارہ غاتا اجتماعی کوشست آتیان زرگزرانی چیلنج آتا مون ءِ تورینن، وزیراعظم شہباز شریف نا میڈیا تون گپ وتران

نیویارک۔ 25 ستمبر (اے پی پی) وزیراعظم محمد شہباز شریف پارینے کہ ترک صدر اقوام متحدہ نا جنرل اسمبلی ٹی فلسطین نا ویل ءِ گچین وڑاٹ پیش کرینے، ہرامچ آ ہال اٹی ساڑی مخلوق نا است اٹ لگا، نن زرگزرانی چیلنج آتے امنا کرین، اللہ تعالیٰ نا بے پناہ فضل و کرم اٹ حکومت و غٹ ادارہ غاتا اجتماعی کوشست آتیان زرگزرانی چیلنج آتا مون ءِ تورینن۔ وزیراعظم آفس نا میڈیا ونگ آن جاری بیان نارداٹ وزیراعظم محمد شہباز شریف ترک صدر رجب طیب اردوان تون اوڑدہی آن پد میڈیا تون گپ وتران کرسا پارے کہ اینو اقوام متحدہ ٹی ترک صدر بھاز پرجوش تران کرے، ترک صدر تون اوڑدہی ٹی سیرحاصل گپ وتران مس،ترک صدر فلسطین نا ویل ءِ ہراوڑ بیان کرے، اومچ آہال اٹی مخلوق نا است ءِ درینے۔ وزیراعظم ترک صدر ءِ اونا تران آ مبارکباد پیش کرسا پارے کہ پاکستان و ترکیہ نا برادرانہ تعلقداری ءِ، ترک صدر تون برادرانہ تعلقداری نا غٹ پلوآتیا گپ وتران مسنے، ترک صدر بھاز زوت پاکستان نا دورہ ءِ کیک۔ وزیراعظم مستی پارے کہ پگہ آئی ایم ایف بورڈ انا دیوان ءِ ، آئی ایم ایف نا شڑت آک سخت ئسر ولے نن اونا غٹ شڑت آتے پورو کرینن۔ اوچین، سعودی عرب، متحدہ عرب امارات تون است انا حب اٹ منت واری ءِ ہرفساپارے کہ اونا کمکاری آن بیدس داممکن الوکہ۔ آئی ایم ایف معاہدہ گڈیکو ریسہ غاتیٹی ءِ۔ وزیراعظم پارے کہ آئی ایم ایف نا گڑاس شڑت آتا تعلق چین اتون ئس ، چینی حکومت مستین آنبار دُوارہ پاکستان نا دُوءِ سوگو کرے، چینی سرکڑدہ غاتا منت واراُٹ۔ وزیراعظم محمد شہباز شریف پارے کہ نن زرگزرانی چیلنج آتے امنا کرین، اللہ تعالیٰ نا بے پناہ فضل وکرم اٹ حکومت و غٹ ادارہ غاتا اجتماعی کوشست آتیان زرگزرانی چیلنج آتامون ءِ تورینن، زرگزرانی ٹک آتیٹی پدریسہ گچینی بننگ ءِ۔ اودعاکرے کہ اللہ تعالیٰ ننا سمت ءِ درست کے و ننے پاکستان نا الس نا حتی المقدور خذمت کننگ ناتوفیق عطاکے۔