وزیراعظم شہباز شریف نا ترک صدر تون اوڑدہی، واپار، زرکاری، دفاع وسلامتی نا بشخ آتیٹی تین پہ تینی کمکاری ءِ پین سوگو کننگ آامنا

نیویارک۔ 25 ستمبر (اے پی پی) پاکستان و ترکیہ واپار، زرکاری، دفاع و سلامتی نا بشخ آتیٹی تین پہ تینی کمکاری ءِ پین سوگو کننگ آ امنا کرینو، وزیراعظم بھارت نا غیرکانودی کوزہ ٹی جموں وکشمیر نا مظلوم الس کن ترکیہ نا سوگو و آخبتی مخ تفی نا ستاءِ کرے، وزیراعظم و ترک صدر علاقائی و جہانی امور خاص وڑاٹ غزہ ٹی برجانسل کشی و سنگین انسانی حالیت آتیاہم گپ وتران کریر۔ وزیراعظم محمد شہباز شریف اقوام متحدہ نا جنرل اسمبلی نا 79 می دیوان نا وخت آ ترک صدر تون اوڑدہی کرینے۔ وزیراعظم آفس نا میڈیا ونگ انا کنڈآن جاری بیان ناردات وزیراعظم محمد شہباز شریف ترک صدر رجب طیب اردوان تون نیویارک اٹی اقوام متحدہ جنرل اسمبلی نا 79 می دیوان نا وخت آ  اوڑدہی کرینے۔ ہڑتوم آ راہشونک ہڑتوم آ کنڈآتا امور آتیا گپ وتران کرسا واپار، زرکاری، دفاع و سلامتی نا بشخ آتیٹی تین پہ تینی وڑاٹ فائدہ ئی کمکاری ءِ پین سوگو کننگ آ امنا کریر۔ اوآخبت خڑک اٹی اسلام آباد اٹی اڈ ہلوک پاکستان۔ ترکیہ بڑزکو کہولی سٹریٹجک کو آپریشن کونسل نا 7 می دیوان نا تیاری تا جاچ ءِ ہم ہلکر۔ ہڑتوم آ راہشونک علاقائی و جہانی امور خاص وڑاٹ غزہ ٹی برجانسل کشی و سنگین انسانی حالیت آتیاہم گپ وتران کریر۔ اوغزہ ٹی دمدستی وڑاٹ انسانی بنداوتیا جنگ بندی و بے چیٹی نا چٹفنگ نا خواست کریر۔ وزیراعظم محمد شہباز شریف غیرکانودی وڑاٹ بھارت نا کوزہ ٹی جموں وکشمیر نا مظلوم الس کن ترکیہ نا سوگو و آخبت مخ تفی نا ستاءِ کرے۔ اوڑدہی ٹی صدر اردن وزیراعظم محمد شہباز شریف نا زرگزرانی پالیسی تا ستاءِ کرے ہرافتا سوب پاکستان نازرگزران اٹی سوگوی بسنے۔ ترک صدر وزیراعظم نا کماشی و اقتصادی اصلاحات نا عزم انا ستاءِ کرے۔ داکان بیدس صدر رجب طیب اردوان وزیراعظم محمد شہباز شریف ءِ سال دے انا مبارکبادی ہم تس۔