اسکول آن پیشن دونیم کروڑ چناتے تعلیم نا زیور آن شپ کننگ غٹ آن بھلا چیلنج ءِ، وزیراعظم محمد شہباز شریف نا شرہ غان تگران

نیویارک۔ 25 ستمبر (اے پی پی) وزیراعظم محمد شہباز شریف ملک اٹی آب اٹ تعلیم نا مون آ دننگ ءِ اولیت گوندسا پارینے کہ اسکول آن پیشن دونیم کروڑ چناتے تعلیم نا زیور آن شپ کننگ غٹ آن بھلا چیلنج ءِ، موسمیاتی بدلی نا اثر و دہشت گردی نا سوب ننے بھلو مالی و جونی نسخان ہرفوئی تما، پاکستان کون آ ملک آتے داوڑنا حالیت آتیٹی وام و کڑز ہلوئی تمک ہرااوفتے کن گھٹ انا چھٹ اسے ءُ۔ داخیال آتا درشانی ءِ او اقوام متحدہ نا جنرل اسمبلی نا 79 می دیوان نا وخت آ اقوام متحدہ نا کنڈآن ’’پائیدار شونداری نا ہدف آتیا ایس ڈی جی مومنٹ‘‘ نا سرحال آ شرہ غان تران کرساکرے۔ وزیراعظم محمد شہباز شریف پارے کہ ملک اٹی تعلیم نا مون آ دننگ کن سنبرینگوک اُن، پنجاب اٹی تینا 10 سال انا حکومت اٹی تعلیمی بشخ اٹی بھلو بدلی اس ایسُن۔ اوپارے کہ پنجاب اٹی تعلیم نا مون آ دننگ کن چندی گام گیج کرین و راج انا پدسلوک تپہ غاتے واکدار کرین ہرا تینا چناتے تعلیم آن آراستہ کننگ کتورہ، پنجاب انڈومنٹ سکیم و واؤچر اسکیم نا کمک اٹ مار و مسن تے اوفتا علاقہ ٹی اسکول آتیٹی داخلہ تننگا، پنجاب انڈوومنٹ آن گچین کارکڑد نا درشانی کروک آ لکھ آحقدار طالب علم فائدہ ہرفیر، دا سویلی ایشیانا غٹ آن بھلا انڈوومنٹ فنڈ ءِ ہراٹی ملک و پیشن نا ملک تعلیم کن باصلاحیت و حقدار چناتے وظیفہ تننگک۔ اوپارے کہ مچ آ صوبہ ٹی دانش اسکول جوڑ کننگا ہراٹی نیزگار و چوری آ لائخی ورناتے تعلیم تننگک، دااسکول آتیٹی پوسکن آ سراتی تے فراوان کننگانے، داڑے طالب علم آتے ووکیشنل ٹریننگ تننگک، داطالب علم آک ڈاکٹر ، انجینئر آتون اوار چندی بشخ آتیٹی تینا لائخی تے منفنگ ءُ۔ برطانیہ نا ڈیفڈ وپنجاب نا نیام اٹ کمکاری آن اسکلز ڈویلپمنٹ پروگرام نابناءِ کننگا۔ وزیراعظم پارے کہ ننا طالب علم آتیا زرکاری آخبت آ زرکاری ءِ، نن کمپنی تے ادائیگی کرسا طالب علم آتے تربیت ترفنہ، داٹی ہچ ءُ کرپشن اس اف، داگیم چینجر ءِ ، ولے دونیم کروڑ چناتا اسکول آتیان پیشن مننگ بھلو چیلنج اسے۔ اوپارے کہ پاکستان کون آ پدتموک ملک آک تعلیم تون اوار ایلو بشخ آتیٹی زرکاری نادوئی کننگ کن جہد کیرہ۔ 2022ء اٹی پاکستان اٹی بھسکار نوکاپ بس، پاکستان موسمیاتی بدلی نا غٹ آن زیات زہمی ملک آتیٹی اوار ءِ، داٹی ننا ہچ ءُ قصور اس اف انتئے کہ داٹی ننا بشخ اسہ درسد آن ہم کم ءِ، اوپارے کہ زیاری آ گیس آتا غٹ آن زیات اخراج کروک آ ملک آک دانا زموار ءُ، بے بریبری، ناانصافی و بے انصاف اٹ نظام اٹ دا ویل  ایسر مننگ کپک۔ اوپارے کہ نن نائن الیون آن پد دہشت گردی تون مون تسن، دہشت گردی نا برخلاف جنگ اٹی 88 ہزار پاکستانی شہیدمسر، نن داناسور ءِ شکست تسن، ننے داڑآن ارب آ ڈالر نسخان مس، ننے دا شیطانی سرکل آن پیش تمنگ کن وام و کڑز ہلوئی تمک، داگھٹ اٹی پاہو نا چھٹ ءِ و نن داڑآن پیش تمنگ نا کوشست کینہ تو اونا قیمت ءِ اداکروئی تمک۔