ہراوڑاٹ تحریک انصاف ءِ مخصوص نشست تننگا اوٹی بھاز ابہام ارے، مخصوص نشست آتیا آئینی و کانودی سوج آتا ورندی بننگ المی ءِ، عطاء اللہ تارڑ

نیویارک۔ 25 ستمبر (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پارینے کہ نن پارلیمان نا بالادستی آ یخین تخنہ، اسپیکر قومی اسمبلی و پنجاب اسمبلی الیکشن کمیشن آف پاکستان ءِ چٹھی نوشتہ کریر ہراٹی سوج کننگاکہ اسہ ہند ن ءُ جماعت اس ہرانا پارلیمان اٹی وجود ہی مف، اودے ہراوڑ مخصوص نشست تننگ مریک، آزاد اومیتدار آتے مسہ دے انا تہہ ٹی سیاسی جماعت اسے ٹی شمولیت اختیار کروئی مریک، تحریک انصاف سنی اتحاد کونسل اٹ شمولیت اختیار کرے ہرانا پارلیمان اٹی وجود ہی الوکہ، سلمان اکرم راجہ بھاز عجیب ءُ بیان اس تسنے، شرفمند آ جج آتا بارواٹی وکیل آک داوڑ گپ وتران آن پانادکیر، ہراوڑاٹ پی ٹی آئی ءِ مخصوص نشست تننگا، اوٹی بہاز ابہام ساڑی ءِ، مخصوص نشست آتیا آئینی و کانودی سوج آتا بننگ المی ءِ۔ سے شنبے نادے آ خصوصی گپ وتران کرسا بنجائی وزیر حوالکاری پارے کہ ساڑی آ دے تیٹی پارلیمان نا بالادستی نا بابت باندات آتیا شرہ مسنے، اسپیکر قومی اسمبلی و اسپیکر پنجاب اسمبلی الیکشن کمیشن آف پاکستان ءِ نوشتہ کریر و پاریر کہ داوڑناسیاسی جماعت ءِ ہراوڑ مخصوص نشست تننگ مریک ہرانا پارلیمان اٹی وجود ہی اف، کانود وڑاٹ اودے مخصوص  نشست تننگ مفک۔ بنجائی وزیر پارے کہ رولز مہالو آن ساڑی الوکہ، پارلیمان الیکشن ایکٹ 2017 ء ٹی ترمیم کرے ہرانا رداٹ اسہ ہم آزاد اومیتدار اس مسہ دے انا تہہ ٹی سیاسی جماعت اسے ٹی شمولیت اختیار کننگ کیک۔ سیاسی جماعت اسے ٹی شمولیت اختیار کننگ کن جمع کرفوک آ سوغند نامہ غاتا خلاف ورزی فلور کراسنگ تصور مریک۔ اوپارے کہ تحریک انصاف تون چوائس ئس، تحریک انصاف سنی اتحاد کونسل اٹی شمولیت اختیار کرسا غلطی کرے انتئے سنی اتحاد کونسل نا پارلیمان اٹی وجودہی الوکہ، تحریک انصاف پارلیمان اٹ ساڑی ایم ڈبلیو ایم ءِ ہم جوائن کننگ کریکہ۔ اوپارے کہ تحریک انصاف نا دا غلطی ءِ ہراوڑ سہی کننگ مریک، آیا ہموفک ہراسوغند نامہ غاتے جمع کرفیر انت او دروغ تڑ ئسر؟ انت پارٹی بدل کننگ نا گنجائشت ہر اسٹ ءِ ملک؟ ہراسٹ نا است خوائے او سوغند نامہ ءِ منسوخ کرسا پارٹی ءِ بدل کننگ کیک؟ بنجائی وزیر حوالکاری پارے کہ پی ٹی آئی راہشون سلمان اکرام راجہ شرفمند آ جج صاحب نابارواٹی عجیب ءُ بیان اس تسنے، شرفمند آ جج آتا بارواٹی وکیل آک داوڑنا گپ وتران بایدے کپس، و اگہ اوفتا بیان اٹی حقیقت ءِ تو اونا باقاعدہ وضاحت برے، دا بھلو حیرانگی نا ہیت اسے و سمجھ بفننگ ءِ کہ پی ٹی آئی نا لیڈر آن ایئر داہیت ءِ امر کننگ ءِ۔ اوپارے کہ نن پارلیمان نا بالادستی کن اسپیکر نا کڑد انا ستاءِ کینہ، داباندات آ اسپیکر تون سلوک اُن کہ کانود سازی ءِ اوورول کرسا فلورکراسنگ ناموکل امر تننگ مریک؟ اوپارے کہ اسپیکر ہراسوج ءِ ہرفینے او کانودی وآئینی سوج اسے۔ داکان بیدس جسٹس یحییٰ آفریدی نا اختلافی نوٹ انا تہہ ٹی بھاز اہم ٹک آتے چست کننگانے و باضابطہ وڑاٹ پاننگانے کہ اسہ پارٹی اس ہرا سماعت اٹی فریق ہی الوکہ، نئے اودرخواست تسوسس، اودے ہراوڑ ریلیف تننگ مریک۔ بنجائی وزیر حوالکاری پارے کہ دا بھازاہم و آئینی ءُ سوج اسے کہ فریق اس مف و ریلیف خواہنگپ و اودے ریلیف تننگے، ہراوڑاٹ تحریک انصاف ءِ مخصوص نشست تننگا، اوٹی بھاز ابہام ءِ، اونا ورندی بننگ المی ءِ۔