وزیراعظم محمد شہباز شریف اقوام متحدہ جنرل اسمبلی نا دیوان اٹی بشخ ہلنگ کن نیویارک آ سرمس

نیویارک۔ 24 ستمبر (اے پی پی) وزیراعظم محمد شہباز شریف اقوام متحدہ نا جنرل اسمبلی نا دیوان اٹی بشخ ہلنگ کن نیویارک آ سرمسنے۔ وزیردفاع خواجہ محمد آصف، وزیر حوالکاری و شینکاری عطاء اللہ تارڑ ، وزیر بنجائی تعلیم و کسبی تربیت خالد مقبول صدیقی و خصوصی کمکار طارق فاطمی ئسک وزیراعظم تون اوار دورہ ٹی شریک ءُ۔ وزیراعظم تینا دورہ ٹی اقوام متحدہ نا جنرل اسمبلی نا دیوان آن تران کیک ۔ داڑتون اوار اوار وزیراعظم پائیدار شونداری نا ہدف آتون تعلقدار ایس ڈی جیز مومنٹ 2024، سلامتی کونسل نا لیڈرشپ فارپیس نا سرحال آن ہائی لیول اوپن ڈیبیٹ و ودوک آ سطح سمندر آن گمانی خطرہ غاتیا بڑزکوکہولی دیوان اٹی بشخ و گپ وتران کیک۔ وزیراعظم نیویارک اٹی امریکہ۔ پاکستان بزنس کونسل و پاکستانی بینکر آتون اوڑدہی ہم کیک و اوفتے حکومت نا کاروبار و زرکاردوست پالیسی تیان معلومدار کیک ۔ وزیراعظم اقوام متحدہ نا سیکرٹری جنرل انتونیوگوتریس ، جنرل اسمبلی نا صدر فیلیمون یانگ، یورپیئن کمیشن نا صدر ارسلاوون ڈرلیئن تون اوڑدہی تون اوار اوار گیٹس فاؤنڈیشن نا بانی بل گیٹس، جہانی بینک انا صدر اجے بانگا و جہانی مالیاتی فنڈ انا منیجنگ ڈائریکٹر کرسٹالینا جارجیوا تون ہم اوڑدہی کیک۔ وزیراعظم فلسطین نا صدر محمود عباس تون خصوصی اوڑدہی کیک ہراٹی فلسطین اٹ برجا صہیونی ظلم وجور ءِ توننگ و جہانی برادری ءِ دازمرہ ٹی گام گیج آتے ترند کننگ کن آمادہ کننگ نا بابت سلابت مریک۔ وزیراعظم سنگت ملک آتا سروک آتون ہڑتوم آ کنڈآتیا اوڑدہی کیک ، برونائی دارالسلام نا سلطان حسن البلقیہ نا کنڈآن برونائی نااقوام متحدہ ٹی رکنیت نا 40 سال پورو مننگ آ تروک آ دے انا اِرغ و بنگلہ دیش نا چیف ایڈوائزر ڈاکٹرمحمد یونس نا کنڈآن بنگلہ دیش نا اقوام متحدہ نا رکنیت نا 50 سال پورو مننگ آ تروک آ سُوارہ ٹی ہم بشخ ہلیک۔ وزیراعظم تینا دورہ ءِ امریکہ ٹی جہانی راہشون آتا مون آ موسمیاتی بدلی نا خطرہ غاتا گواچی ملک آتاویل، ڈیہہ اٹی دہشت گرد آتا چٹفنگ کن پاکستان نا قربانی، جہانی زرگزرانی نظام و وامدار ملک آتا ویل، کشمیر اٹی بھارتی غیرکانودی کوزہ و ظلم وجور و اسرائیل نا کنڈآن کودک فلسطینی تا برجانسل کشی نا بابت توار بڑزکیک۔