مزن وزیر ءَ ہمک میاں اوستمانی فورم ءَ فلسطین ءُ کشمیر ءِ جیڑہ ءَ را پدر کتگ ، عمران خان  ءِ دورءَ پاکستانءِ تنّائی ءِ آماچ بوتگ،   مرچی مئے دری کارانی پالیسی گہتر بوتگ،   پاکستان دیمروئی کتگیں مارکیٹ جوڑ بوتگ،   عطاء اللہ تارڑ

نیویارک۔24ستمبر  (اے پی پی) حالءُ اھیوال کاریءُ شنگکاری ءِ بنجاہی وزیر عطاء اللہ  تارڑ ءَ گشتگ کہ مزن وزیر محمد شہباز شریف ءَ ہرچ میاں اوستمانی فورم ءَ فلسطین ءُ کشمیرءِ جیڑہءَ را پدر کتگ،  فلسطین ءَ امنءُ ایمنی ءَابید دنیاءَ امنءُ ایمنی بوت نہ کنت، پاکستان ءِ درستاں چہ مستریں جیڑہ موسمیاتی مٹءُ بدلی ایں،  پاکستان ءَ چہ تنا 2  درسد کاربن درکئیت  وہدے کہ گیش نقصان پاکستان ءَ را بیت، مرچی مئے دری کارانی پالیسی گہتر بوتگ اَنت، عمران خان ءِ دورءَ  پاکستان تنّائی ءِ  آماچ بوتگ، سی پیک بند بوتگ، امریکی پندل ءِ بھتان جنگ بوتگ، دوستیں ملک ناراض بوتگ اَنت، انوگیں دورءَ دوستیں ملک آنی گوما مئے سیادی  شر بوتگ اَنت،  پاکستان معاشی ردءَ  یک دیمروئی کتگیں مارکیٹ جوڑ بوتگ، گران بہائی سنگل ڈیجٹ ءِ سرءَ اَتکگ، موڈیزءُ  فچءِ ریٹنگز اپ گریڈ بوتگ۔ بنجاہی وزیر ءَ گشتگ کہ مزن وزیر محمد  شہباز شریف ہرچ میاں اوستمانی فورم ءَ گپ کتگ کہ اسرائیل فلسطین ءَ جنگی جرم   گیش بوتگ اَنت،  غزہ، خان یونس، رفحءَ  فلسطین آنی سرءَ زُلم ءُ ناحکی کنگ بوھگءَ ایں، اسرائیل فلسطینی آنی نسل  کشی ءَ کنگءَ ایں۔ آئی ءَ گشتگ کہ مزن  وزیرءَ  ہرچ وہد ءَ کہ وتی فلسطین ءِ گپ کتگ گڑااے لیکہ پیش کتگ کہ پاکستان 1968ء ءِ پیسرءِ  سیمسرآنی ردءَ آزاتیں فلسطینی ریاستءَ را  من ایت  کہ آئی ءِ بنجاہی حکومت القدس شریف بہ بیت،  فلسطین ءَ امنءُ ایمنی ءَ ابید دنیاءَ امنءُایمنی بوت نہ کنت۔ بنجاہی وزیر ءَ گشتگ کہ  ما لوٹاں کہ فلسطین ءَ امنءُ ایمنی بہ بیت، جنگ بند بہ بیت، پاکستان ءَ سی 130 گراب ء ُ بحری گرابانی وسیگءَ کمکی سامان فلسطین ءَ را سرکتگ۔ فلسطین ءَ  ہرچ ہما میڈیکل ءِ   نودربر کہ  آیانی وانگءُ زانگ نہ سرجم بوتگ، پاکستان ءَ ہمے نودربرآناں وتی میڈیکل دربرجاہ آں داخلہ دئیگءِ گشتگ، ما لوٹاں کہ فلسطین ءِ نودربر وتی وانگءُ زانگاں سرجم بہ کن اَنت تنکہ فلسطین ءَ ڈاکٹرآنی کمی مہ بیت۔ یک جستے ءِ پسوءَ بنجاہی وزیر ءَ گشتگ کہ پاکستانءِ  درستاں چہ مستریں جیڑہ موسمیاتی مٹءُبدلی ایں، دنیا ءَ پاکستان تنا 2 درسد کاربن   حارج کنت بلے نقصان ءِ گیشاں چہ گیش دیمپانی ءَ کنگءَ ایں۔ آئیءَ گشتگ کہ اقوام متحدہ ءِ سیکریٹری جنرل ءَ پاکستان ءَ  وت ھارءِ چارءُ تپاسی کتگ۔ آئی ءَ گشتگ کہ پاکستانءِ دری کارانی پالیسی 2018 ءَ  پد آئسولیشن ءِ آماچ بوتگ اَنت، رو درآتک، روبرکتءُ مشرق وسطیٰ ءَ مئے دوستیں ملک   ناراض بوتگ اَنت، انوگیں دورءَ دوستیں ملک آنی گوما سیادی  شر بوتگ اَنت، ءُ ایشی ءِ نتیجگءَ پاکستان ءِ در ی کارانی پالیسی ءِ تہا گہتری اَتکگ۔آئی ءَ گشتگ کہ بلومبرگءَ پاکستان ءِ اسٹاک  مارکیٹءَ را پاکستان ءِ  پائدگ مندیں مارکیٹ لیک اِتگ،  گران بہائی سنگل دیجٹ  9.6 درسد ءَ اَتکگ، موڈیز ءُ فچ ءَ پاکستان ءِ ریٹنگز اپ گریڈ   کتگ، برآمدات ءِ تہا 14  درسد  گیشی بوتگ، آئی ٹی برآمدات 3.1 ارب ڈالرءَ سربوتگ اَنت، ترسیلات زرءِ تہا گیشی ءُ پالیسی ریٹ جہل اَتکگ اَنت۔ آئی ءَ گشتگ کہ پاکستان ءِ  معیشت   بحال بوتگ، معاشی اشارئیے گہتر بوتگ اَنت، ایشی ءِ تہا گہتری کئیت ءُ دنیا پاکستان ءِ زرکاری ءَ چہ پائدگ چست کت کنت۔ بنجاہی وزیرءَ گشتگ کہ آئی ایم ایف ءُ ورلڈ بینک ءِ گوما مئے کار  پہ جوانیءَ بوھگءَ اَنت۔ آئی ایم ایف منءُ گر فائنل بوھگءَ اَنت، اُلسءَ را زوت وشیں حال ءَ سرکناں۔ یک جستے ءِ پسوءَ بنجاہی وزیر ءَ  گشتگ کہ پی ٹی آئی ءِ چیئرمین ءَ وتی دورءَ پاکستان ءَ را تناّئی ءِ آماچ کتگ، سی پیک ءَ را بند کتگ، امریکی  پندل سازگءِ بھتان جتگ، دوستیں ملک آناں ناراض کتگ،    دری کارانی آ وہدءَ چوں بوتگ ءُ نوں چون ایں،  گہتری چوں ا  َتکگ،شما وت ایشی ءِ جج اِت۔ یک دگہ جستےءِ پسوءَ آئی ءَ گشتگ کہ مزن وزیر محمدشہباز شریف ءِ پاکستانی کمیونٹی ، ڈاکٹر، بینکرءُ  زندءِ ایندگہ تکءُ پھناتاں چہ سیادی داروکیں پاکستانی آں گوں گندءُ نند ٹائینگ بوتگ، کوشست بیت کہ میڈیاءَ را  ساھت پہ ساھت  ھال دئیگ بہ بیت، مزن وزیر ءِ حاسیں گندءُ نندآنی معلوم داری میڈیا ءَ شئیر کنگ بنت۔