اسلام آباد۔ 20 ستمبر (اے پی پی) ڈپٹی چیئرمین سینیٹ سیدال خان ناصر تون پاکستان مسلم لیگ (ن) نا سینئر راہشون ومسکوہی بنجائی وزیر خواجہ سعد رفیق اونا ہنکین آ اوڑدہی ٹی اونا مزاج پرسی ءِ کرے و اونا بلغڑ نا کزیت آ ہڑزخواہی نا درشانی ءِ کرسا اوڑکن بخشش نا دعاکرے۔ ڈپٹی چیئرمین سینیٹ مسلم لیگ (ن) نا سینئر راہشون و مسکوہی بنجائی وزیر خواجہ سعد رفیق ءِ بخیرکرے، و ملک انا جم سیاسی و اقتصادی حالیت آتیا سرجمی اٹ گپ وتران کریر۔ خواجہ سعد رفیق پارےکہ ملک انا زرگزرانی و سیاسی باندات آتا گچینی کن گام گیج کننگ انگ ءِ پاکستان مسلم لیگ (ن) ملک انا غٹ آن بھلا سیاسی جماعت ءِ ملک ءِ مون تروک ویل آتیان کشنگ کن ساڑی حکومت گام گیج کننگ اٹی ءِ و ملک انا غٹ سیاسی جماعت آتے ملک انا گچین مفاد کن ساڑی حکومت تون بایدے تفر۔ مسکوہی بنجائی وزیر خواجہ سعد رفیق سینیٹ اٹی ڈپٹی چیئرمین سینیٹ سیدال خان نا خذمت آتا ستاءِ کرے و اودے خراج تحسین پیش کرے۔ اوپارےکہ ساڑی حکومت نا کوشست ءِ کہ ہندن ءُ کانود جوڑ کننگے ہرا ملک انا اقتصادی، زرگزرانی ، راجی و سیاسی ویل آتے ایسر کننگ کن فائدہ مند مریر۔ ساڑی حکومت نا کوشست آتیان ملک اناحالیت آتیٹی گچینی نظربننگ ءِ۔ وزیراعظم پاکستان نا کوشست ءِ کہ ملک اٹی زیات آن زیات جہانی زرکاری اتنگے تانکہ ملک انا زرگزرانی حالیت آتیٹی گچینی اتنگ مرے۔ اوپارےکہ ساڑی حکومت نا کوشست آتیان ملک اٹی کبینی نا کچ اٹی پدریسہ کمتی مون آبسنے۔ پیٹرولیم و بجلی تون اوار چندی کنوئی آ گڑاتا نہاد آتیٹی ہم کمتی مسنے۔ ڈپٹی چیئرمین سینیٹ سیدال خان پارےکہ ملک انا زرگزرنی، سیاسی، راجی حالیت آتے گچین کننگ نا غٹ سیاسی جماعت و تعلقدار اسٹیک ہولڈر آتا فرض مریک کہ او ملک انا گچین فائدہ و الس ءِ ریلیف تننگ کن اسہ پنہ غا بریر۔ ملک ءِ داوخت آ سیوت و یکجہتی ، امناو اسیجائی لائحہ عمل نا گرج ءِ غٹ سیاسی جماعت آک ملک و الس نا شونداری و شونہالی کن ساڑی حکومت تون بایدے تفر۔ اوپارے کہ پاکستان مسلم لیگ (ن) ملک انا بانی و قومی جماعت ءِ۔ پارلیمنٹ اسہ سپریم ادارہ ءِ۔ اونا سینیٹ اٹی ملک انا غٹ اکائی تے اسہ وڑ نمائندگی دوئی ءِ۔ داایوان ملک انا گچین فائدہ غاتیکن گچین کانود جوڑ کننگ ءِ۔ ڈپٹی چیئرمین سینیٹ پارے کہ ملک انا غٹ سیاسی جماعت آتا باسک آتیان خواست ءِ کہ او ملک ءِ مون تروک تنکی تیان کشنگ کن ساڑی حکومت تون تفر و پارلیمان نا ہڑتوم آ ایوان تیٹی چاگڑد ءِ گچین کننگ کن تینا کڑد ءِ اداکیر۔ مسکوہی بنجائی وزیر خواجہ سعد رفیق پارےکہ ساڑی حکومت پاکستان ءِ مون تروک ویل آتیان کشسا شونداری نا کنڈ آ دننگ کن سنبرینگوک ءِ۔ اوپارے کہ ملک انا گچین فائدہ کن ساڑی حکومت ملک انا غٹ سیایس جماعت آتون اوار ہِننگ کن ہم تیار ءِ۔ ساڑی حکومت الس ءِ ریلیف تننگ کن چندی ڈٹ آتیاکاریم کننگ اٹی ءِ۔ ہنداسوب ءِ کہ ملک اٹی کبینی نا کچ اٹی خاص ءُ کمتی اس مون آ بسنے و واپار و کاروبار شون ہلنگ ءُ۔
