اسلام آباد۔ 20 ستمبر (اے پی پی) آئی اے ای اے نا بورڈ آف گورنرز نا باسک انا وڑاٹ پاکستان نا گچین کاری جوہری توانائی نا پرامن کاریم اٹ اتنگ ءِ مون آ دننگ تون اوار اوار جہانی ادارہ نا پالیسی و پروگرام تا ٹہیفنگ اٹ اونا مثبت کڑد ءِ مون آدننگ و اونا گرج و مسخت آتون پاکستان نا متکن آ وابستگی نا اعتراف ءِ۔ داہیت ءِ جمعہ نادے آ دفترخارجہ نا کنڈآن جاری بیان اٹی پاننگا۔ بیان نا رداٹ پاکستان ءِ اِرا سال انا مد2024آن 2026 اسکان انٹرنیشنل اٹامک انرجی ایجنسی (آئی اے ای اے) نا بورڈ آف گورنرز نا باسک گچین کننگانے، ویاناٹی آئی اے ای اے نا جنرل کانفرنس نا 68 می دیوان اٹی دے ٹک نیامی و سویلی ایشیانا ڈیہہ تیان پاکستان ءِ برجاتُو انا بناآن بناکروک آ مد اکن امنائی سلاہ اٹ گچین کننگانے۔ داآئی اے ای اے نا بورڈ آف گورنرز آ پاکستان نا 21 می مد ءِ۔پاکستان نا گچین کاری جوہری توانائی نا پرامن کاریم اٹ اتنگ ءِ مون آدننگ تون اوار اوار آئی اے ای اے نا پالیسی و پروگرام تا ٹہیفنگ اٹ اونا مثبت کڑد ءِ مون آدننگ و آئی اے ای اے نا گرج و مسخت آتیکن اونا متکن آ وابستگی نا اعتراف ءِ۔ پاکستان انٹرنیشنل اٹامک انرجی ایجنسی نا بانی باسک ءِ و او ایجنسی تون جوہری توانائی نا پرامن کاریم اٹ اتنگ آ متکن و تین پہ تینی وڑاٹ فائدہ مند کمک کرینے۔ پاکستان انٹرنیشنل اٹامک انرجی ایجنسی نا ریز آف ہوپ گام انا رداٹ سینٹر فار کینسر کیئرآن بیدس خور وکشت وکشار ، نیوکلیئر سیفٹی اینڈ سیکورٹی، واٹرریسورس مینجمنٹ و پوسکن آ نیوکلیئر ٹیکنالوجی ایپلی کیشن تا بشخ آتیٹی چار ہند آتے چلیفک۔ داکان بیدس، پاکستان اٹ 3530 میگاواٹ ساف توانائی نا لائخی اتون شش آپریٹنگ نیوکلیئر پاور پلانٹ ءُ، وخت اس کہ 1200 میگاواٹ نا اسہ پین نیوکلیئر پاور پلانٹ اس جوڑ مننگ ءِ۔ بیان نا رداٹ پاکستان ایجنسی نا تکنیکی کمکاری نا پروگرام و کمکاری نا فریم ورک انا کمک اٹ انٹرنیشنل اٹامک انرجی ایجنسی نا باسک ملک آتون جوہری ٹیکنالوجی نا پرامن کاریم اٹ اتنگ اٹی تینا آزموندہ و مہارت نا اشتراک کننگ کن سنبرینگوک ءِ ۔ برجاتُو انا بناٹی پاکستان ءِ نیوکلیئر سیفٹی نا کنونشن (سی این ایس) نا دہ می جاچ دیوان کن ہم صدر گچین کننگاسس۔
