اسلام آباد۔ 23 جولائی (اے پی پی) وزیراعظم نا کوآرڈینیٹر ہیلتھ ڈاکٹر مختاراحمد بھرتھ پارینے کہ وزیراعظم نا ہیپاٹائٹس سی نا چٹفنگ نا پروگرام نا زوت بناءِ کننگ انگ ءِ، داپروگرام کن 68 ارب روپئی نا پی سی ون منظور مسنے، ہرابندغ آتا ہیپاٹائٹس ٹیسٹ مثبت بریک اوفتا درمان ءِ مفت کننگک۔ سے شنبے نادے آ وزارت جان جوڑی آن جاری بیان نا رداٹ ڈاکٹر مختارا حمد بھرتھ پارینے کہ پاکستان اٹی ہیپاٹائٹس سی نا ناجوڑآتا کچ اٹی ودکی مننگ ءِ۔ مچ آ دنیا ٹی ہیپاٹائٹس نا کیس آتا کچ 60 ملین ءِ ہرافتیان دہ ملین کیس پاکستان اٹی ارے۔ اوپارے کہ ہیپاٹائٹس نا چٹفنگ نا پروگرام بنجا و ہرچار آ صوبائی حکومت آتا شریداری اٹ بناکننگ انگ ءِ۔ اوپارے کہ آزاد کشمیر و گلگت بلتستان نا الس ہم درمان نا آسودہی آن فائدہ ہرفرہ۔ ہیپاٹائٹس سی انا چٹفنگ ءِ پک کننگ کن وزیراعظم نیشنل ٹاسک فورس انا کماشی ءِ کیک۔ ڈاکٹر مختاربھرتھ پارے کہ مچ آملک اٹی 12 سال آن زیات وئی نا آبادی نا سکریننگ مریک۔ سکریننگ اٹی مثبت مروک آتے پک کننگ کن ٹیسٹ کننگک۔ اوپارے کہ ہیپاٹائٹس سی ٹیسٹ اٹی مثبت بروک آتا مفت درمان ءِ کننگک۔ بنجائی حکومت پروگرام آ عملدرآمد کن پروجیکٹ مینجمنٹ یونٹ اس جوڑ کیک۔ متعدی و غیر متعدی مرض آتا توننگ کن اسہ جوان ءُ حکمت عملی اس جوڑ کرینن۔ ڈاکٹر مختاراحمد پارے کہ ساڑی حکومت جان جوڑی نا بشخ آ خاص چکار کننگ اٹی ءِ۔ جان جوڑی نا بشخ اٹی بھلو کچ اسے آ اصلاحات نا چرجوئی برجاءِ۔
