اسلام آباد۔ 08اپریل (اے پی پی) بنجائی وزیر واپار جام کمال خان پارینے کہ حکومت نا کنڈآن معدنیات نا مون آ دننگ و پیشن نا زرکارآتے بٹنگ و اوفتے کاروبار اٹی آسانی فراوان کننگ آن ملکی زرگزران آ جوان ءُ اثراس تمک، بھاز انگا ملک آک پاکستانی پاکستانی معدنیات نا بشخ اٹی زرکاری کرینوو اوبھاز است جم ءُ۔ داخیال آتا درشانی ءِ او پاکستان منرل انویسٹمنٹ فورم 2025اٹی گپ وتران کرساکرے۔ اوپارے کہ دا فورم اٹی بشخ ہلوک آتے بخیر اٹ پانہ، حکومت پاکستان نا کنڈآن معدنیات نا مون آدننگ و پیشن نا زرکارآتے بٹنگ انگ و زرکارآتے کاروبار اٹی آسانی فراوان کننگ آن ملکی زرگزران آ جوان ءُ اثراس تمک۔ اونا پاننگ ئس کہ پاکستان اٹی بھاز انگا ملک آک معدنیات نا بشخ اٹی زرکاری کرینو و اوتینا زرکاری نا بابت است جم ءُ، ایلو ملک آتے ہم دا بشخ اٹی زرکاری کن بخیر اٹ پانہ و قول کینہ کہ نن اوفتے پبی کمک فراوان کینہ۔ اوپارے کہ بلوچستان اٹی معدنیات و ایلو بشخ آتیٹی بھازانگا ملک آک زرکاری کرینو و حکومت اوفتا پبی مخ تفی ءِ برجاتخانے۔ جام کمال خان پارے کہ بلوچستان و پاکستان نا قطبی علاقہ غاتیان چندی وڑنا کم وود 90معدنیات دوئی کننگ انگ ءِ۔ اوپارے کہ دابشخ ءِ پین زرکاری نا گرج ءِ انتئے کہ جیولوجیکل سروے نا رداٹ پاکستان منرلز آن شپ ءِ و داٹی بےشمار معدنیات ارے ہرا کوالٹی نا اعتبار اٹ ہم ایلو ملک آتا نسبت زیات جوا ن ءُ۔ اونا پاننگ ئس کہ نن خوانہ کہ پین جہانی کمپنی پاکستان نا دابشخ اٹی زرکاری کرسا دابشخ انالائخی تیان فائدہ ہرفر۔ وزیر واپار پارے کہ مہالو آن پاکستان اٹ معدنیات نا بشخ اٹی زرکاری کروک آ کمپنیک تینا آپریشن تے ودفنگ خوارہ و داٹی زرکاری ءِ ودفنگ ءُ۔ جام کمال پارے کہ پاکستان نا 95 درسد وسیلہ غاتے داسکان خننگ انگ تنے، نن خوانہ کہ دنیا برے و دا وسیلہ غاتے پٹنگ تون اوار اوار گچین وڑاٹ کاریم اٹ ہم اتے۔ اوپارے کہ پاکستان اٹی لیتھیئم ، کاپر، سلور، خیسن، چاندی ، ایلومینیئم و ایلو دھات آتا بھلو کوڑی اس ساڑی ءِ، پاکستان جہانی زرکارآتیکن رکھوک ءُ ملک اسے ہرانا شاہدی داڑے ساڑی سد آ جہانی کمپنیک ءُ ہرا تینا تینا آپریشن تے برجاتخنگ تون اوار اوار اوفتے ودفنگ خواہنگ ءُ۔ اونا پاننگ ئس کہ پاکستان ڈیہہ انا ہموملک آتیان ءِ ہراڑے کارپوریٹ سیکٹر زرکاری کننگ خواہک و حکومت پاکستان ہم نجی زرکارآتا مدام است بڈی ءِ کرسا بننگ ءِ۔
