اسلام آباد۔ 08اپریل (اے پی پی) بنجائی وزیر داخلہ محسن نقوی تون پوسکن تعینات ڈی جی ایف آئی اے رفعت مختار راجہ و پوسکن تعینات ڈائریکٹر جنرل نیشنل سائبر کرائم انویسٹی گیشن ایجنسی وقار الدین سید اوڑدہی کرے۔ اوڑدہی ٹی غیرکانودی امیگریشن نا برخلاف گچین حکمت عملی تیار کننگ و سائبر کرائمز نا توننگ نا ٹاسک تننگا۔ وزیر مملکت داخلہ طلال چوہدری و بنجائی سیکرٹری داخلہ محمد خرم آغائسک ہم داوخت آ ساڑی ئسر۔ وزیرداخلہ محسن نقوی ایف آئی اے ءِ پرمان کرے کہ او انسانی اسمگلنگ اٹی اوار مافیا نا برخلاف مچ آملک اٹی گچین کریک ڈاؤن کے۔ انسانی اسمگلنگ نا توننگ کن ہر چار آصوبہ غاتیٹی بے پرخ کارروائی کننگے۔ دامافیا تون سختی اٹ مون تننگے۔ اونا پاننگ ئس کہ مکروہ دھندہ ٹی اوار مخلوق کودک مخلوق نا جون تتون گوازی کننگ ءُ۔ وزیر مملکت داخلہ طلال چوہدری نا پاننگ ئس کہ انسانی اسمگلرآک ہچ ءُ رعایت اسے نا حقدار افس۔ وزیرداخلہ محسن نقوی پارے کہ ایف آئی اے تون اوار غٹ کانود نافذ کروک آ ادارہ غاتے ملک آن غیرکانودی سپیکٹرم و منظم ڈوہ انا چٹفنگ کن اواری اٹ کاریم کروئی مریک۔ اوپارے کہ سائبر سیکورٹی اسہ پوسکن ءُ چیلنج اسے۔ این سی سی آئی نا کاریم ناکچ ءِ ودفنگک و آفیسر آتے تربیت کن پیشن نا ملک آ گدریفنگک۔
