اسلام آباد۔8اپریل (اے پی پی): مزن وزیر محمد شہباز شریف ءَ خلیج ءِ ملک، یورپ، چین، امریکہ ءُ ایندگر دمگ آنی نیمگ ءَ چہ معدنیات ءِ شوبگ ءَ سرمایہ کاری ءِ وش اتک کتگ ءُ گوشت کہ پاکستان ارباں ڈالر ءِ معدنیات ءِ ذخائر ءَ را کارمرد کنان ءَ وام ءَ چہ آجو بوت کنت۔ معدنیات ءِ ارزشت ءَ را گیش کنگ ءَ چہ برآمدات ءَ را دیم ءَ برگ بیت۔ اے سرمایہ کاری پہ ہرکس ءَ فائدہ مند اِنت۔ سرمایہ کار کمپنی ورنا آناں مہارت ءِ پھجارینگ ءِ تہ ءَ وتی کرد ءَ پیلو بہ کن اَنت، ءُ ما یکجاھی ءَ پاکستان ءَ را دگنیا ءِ مزنیں ملک جوڑ کن ایں ۔ آئی ءَ اے ھیالانی درشانی سئے شمبے ءِ روچ ءَ پاکستان منرلز انویسٹمنٹ فورم 2025 ءَ گوں گشتانک دیان ءَ کت۔ اے موہ ءِ سر ءَ مزنیں کساسے ءَ وفاقی وزیر، سر وزیر، اسمبلی ءِ باسک، پاکستانی اُرد ءِ سروک ءُ ھمے رنگ ءَ چین، عرب دگنیا، خلیج، امریکہ ءُ یورپ ءَ ھوار بازیں ملک آنی سفیر ءُ تاجر ھم ھوار اتنت۔ مزن وزیر ءَ فورم ءَ درملکی نمائندہ آناں وش اتک کنان ءَ گوشت کہ آوانی پاکستان ءَ سر بوھگ ءِ سر ءَ وش آتک کناں۔ آئی ءَ دیوان ءِ کامیات برجم دارگ ءِ سر ءَ جارچین آناں مبارک بات دات ءُ گوشت کہ اے دیوان ءِ برجائی ءَ چہ بنجاہی ءُ درملکی سرمایہ کار آنی دلبڈی گیش بیت ءُ اے دیوان ءَ چہ معدنیات ءِ شوبگ ءَ سرمایہ کاری ءِ تہ ءَ گیشی کیت۔ مزن وزیر ءَ ریکو دیک منصوبگ ءِ سر ءَ پیشرفت ءَ را دلبڈی ءِ رنگ ءَ گوشت کہ معدنیات ءِ شوبگ سال آنی تہ ءَ مئے دلگوشی ءِ مستحق بوتگ۔ اللہ تعالیٰ پاکستان ءَ را قدرتی وسائل ءُ معدنیات ءَ چہ پُر مھکم کتگ۔ پاکستان ءِ گور ءَ کھرباں ڈالر ءِ معدنی ذخیرہ است انت کہ ایشی ءَ چہ پاکستان ءَ را قرض ءِ چنگل ءَ چہ آجو کنگ ءِ ھاترا کارمرز کنگ بوت کنت۔ مزن وزیر ءَ گوشت کہ بلوچستان ءِ کوہ ءَ چہ ھئبر پختونخوا ءِ برف ءِ کوہ آں ئُُ آزاد کشمیر ئُُ گلگت بلتستان ءَ چہ سندھ ءِ ڈل ئُُ دشت پنجاب ءَ سرجمیں پاکستان معدن ءَ چہ مالا مال اِنت۔ اے مزنیں اثاثہ آں کارمرز کنگ ءِ ضلورت انت۔ پاکستان ءِ کِشت ءُ کِشار زرخیز اَنت ءُ راج دلیر ءُ چیلنجاں منّگ ءِ واھشت مند اِنت ءُ گوں وتی محنت ءَ ریگزار ءَ زرّ جوڑ کنگ ءِ توان ءَ دار اَنت۔ اگاں وفاقی، صوبائی حکومت، ءُ پاکستانی ادارہ یکجاہ بہ بنت گڑا ما وتی مقدر ءَ سک زوت بدل کنیں بلے ایشی ءِ ھاتر ءَ جزم ءُ ارادہ لوٹیت۔ مزن وزیر ءَ گوشت کہ بلوچستان ءَ کان کنی ءَ چہ دمگی ورنا آنی واستہ روزگار ءِ موہ پیداک بوھگ ءَ انت ایشاں المی ءِ ٹیکنیکل تربیت دیگ ءِ واستہ ادارگ جوڑ کنگ بوتگ انت۔ کاد کنی بلوچستان ءَ چاگردی ءُ اقتصادی دیمروئی ءِ سبب جوڑ بیت۔ مزن وزیر ءَ خلیج ءِ ملک، چین، یورپ، امریکہ ءُ اے دگہ دمگ آنی سرمایہ کار آناں وش آتک کت ءُ گوشت کہ پاکستان ءَ سرمایہ کاری ءِ موہ آناں سرجمی ءَ پائدگ چست بہ کن اَنت۔ کان کنی ءِ شعبہ ءَ سرمایہ کاری ہرکس ءِ واستہ فائدہ مند انت۔ آئی ءَ گوشت کہ پاکستان ءَ دگنیا ءِ درستاں چہ گیش کوئلہ ءِ ذخیرہ است انت، سندھ حکومت کوئلہ ءِ ذخیرہ آناں کارمرد کنگ ءِ واستہ سک باز کوشست کنگ ءَ انت، درآمدیں کوئلہ ءِ بدل ءَ بنجاہی کوئلہ آنی سر ءَ انحصار کنان ءَ ارزشتی ایں درملکی زرّ ءِ بچت کنگ بوھگ ءَ انت۔ اے ذخیرہ سیمنٹ پلانٹ ءُ صنعتی دیمروئی ءِ ھاترا کارمرز کنگ بوھگ ءَ انت۔ پنجاب ءِ چنیوٹ ءِ نزیک ءَ لوہے ءِ مزنیں ذخائر دست کپتگ کہ ایشاں سٹیل ءَ بدل کنگ بیت۔ بلوچستان، خیبر پختونخوا، گلگت بلتستان، ءُ آزات کشمیر ءَ ھم معدنی شعبہ ءَ بازیں کار کنگ لوٹیت۔ مزن وزیر ءَ گوشت کہ خام مال ءِ بدل ءَ تیاریں چیز آنی برآمد ءَ را دل یکیمی کنگ بیت۔ مارا پروڈکٹس ءِ قدر ءَ گیش کنگ ءَ برآمدات ءَ را دیم ءَ برگ لوٹیت۔ آئی ءَ سرمایہ کار آناں زور پر دات کہ آ تیاریں چیز آنی سر ءَ کار بہ کن اَنت، ایشی ءَ چہ آھاں مال برداری ءِ ھرچ ءُ درچ ءَ ھم باز بچت بیت۔ کان کنی ءِ صنعت ءِ واستہ ٹیکنیکل ٹریننگ ءَ را المی لیکگ ءَ آئی ءَ گوشت کہ ورنا آنی ٹیکنیکل ٹریننگ ءِ واستہ پرائیویٹ سیکٹر ءُ حکومت ءِ نیام ءَ شریکداری ءَ را دیمروئی دیگ بیت۔ سرمایہ کاری کمپنی ورنا آناں مہارت ءِ پھجارینگ ءِ تہ ءَ کرد پیلو بہ کن اَنت۔ اے ٹیکنالوجی ءِ ٹرانسفر ءَ ھم کمک کنت۔ مزن وزیر ءَ گوشت کہ پاکستان ءِ قدرتی وسیلگ ءَ چہ زرباری دمگ دیمروئی ءِ مرکز جوڑ بوھگ ءَ انت۔ ما یکجاہ آں پاکستان ءَ دگنیا ءِ یک مزنیں ملکے جوڑ کن ایں ۔
