پاکستان وترکمانستان بڑزکو کہول انا مذاکرات و ہن و برتے مون آ دننگ آ امنا کرینو، ترکمانستان نا قومی راہشون قربان گلی بردی محمدوف نا دورہ ءِ پاکستان نا چاری اُن، سینیٹر اسحاق ڈار

اسلام آباد۔ 23 جولائی (اے پی پی) نائب وزیراعظم و وزیرخارجہ سینیٹر اسحاق ڈار پارینے کہ پاکستان و ترکمانستان بڑزکو کہول انا مذاکرات و ہن و برتے مون آ دننگ آ امنا کرینو، ترکمانستان نا قومی راہشون قربان گلی بردی محمدوف نا دورہ ءِ پاکستان نا چاری اُن، اونا گمانی دورہ ءِ پاکستان ہڑتوم آملک آتا نیام اٹ دوستانہ تعلقداری تے پین سوگوی ایتک۔ داخیال آتا درشانی ءِ او سے شنبے نادے آ داڑے دفترخارجہ ٹی ترکمانستان نا وزیر خارجہ راشد میردووف تون اوار اسیجائی پریس کانفرنس آن تران کرساکرے۔ نائب وزیراعظم پارے کہ پاکستان و ترکمانستان نا تعلقداری امن و شونہالی نا اسیجائی نصب العین آ تالان ءِ۔ ہڑتوم آ ملک آتا الس نا اسہ ایلو تون سوگو تعلقداری ءِ۔ سینیٹر اسحاق ڈار پارے کہ اوڑدہی ٹی نن ہڑتوم آ ایجنڈا  تون علاقائی و جہانی پیش رفت نا ہم احاطہ کرے۔ ترکمانستان نا وزیرخارجہ نا دورہ ءِ پاکستان ہڑتوم آ کنڈآتا ہن و بر و کمکاری نا مون آ دننگ نا عزم انا غماز ءِ۔ خوشی ءِ کہ پاکستان و ترکمانستان نا تعلقداری مثبت سمت اٹی گامزن ءِ۔ اوپارے کہ پاکستان و ترکمانستان نا نیام اٹ ہڑتوم آ کنڈآتا تاریخی برادرانہ تعلقداری جوڑ ءِ۔ تین پہ تینی سلابت نا مسٹ میکو دور اٹی نن چندی بشخ آتیٹی ہڑتوم آ کنڈآتا تعلقداری تا جاچ ءِ ہلکروخت اس کہ نن بڑزکو کہولی مذاکرات و ہن و برتے مون آدننگ آ ہم امنا کرینو۔ نائب وزیراعظم پارے کہ نن سیاست، زرگزران، دفاع تون اوار ایلو بشخ آتیٹی کمکاری ءِ پین ودفنگ آ امنا کریر۔ واپار، زرکاری، توانائی و آئی ٹی نا اولیتی بشخ آتیٹی رابطہ غاتے ودفنگ آ ہم سجفینو۔ اوپارے کہ ترکمانستان نا وزیرخارجہ ءِ پاکستان اٹی زرکاری کن ایس آئی ایف سی نا اہم کڑد آن معلومدار کرے۔ نن ترکمانستان نا کمپنی تے پاکستان اٹی زرکاری نا سلہ خلنہ۔ پاکستانی بندرگاک ہڑتوم آ ملک آتا کاروباری برادری کن پرکشش وارخواہی اس فراوان کیرہ۔ ترکمانستان نا کمپنیک گوادر و کراچی نا بندرگاہ تیان فائدہ ہرفر۔ نائب وزیراعظم پارے کہ تاپی گیس پائپ لائن و الیکٹرسٹی ٹرانسمیشن ڈٹ آتیا ہم گپ وتران کننگا و اوفتا جاچ ءِ ہلنگا۔ اوپارے کہ پاکستان و ترکمانستان آزاد ویزہ پالیسی کن اواری اٹ کاریم کیرہ۔ نن ہڑتوم آکنڈآتا پارلیمانی رابطہ و دودوربیدہ ہن و برتے مون آ دننگ آ امنا کرینن۔ تعلیمی وظیفہ و السی کہول آ رابطہ غاتا مون آ دننگ نا ہم فیصلہ کننگانے۔ سینیٹر اسحاق ڈار پارے کہ نن اقوام متحدہ و ای سی او تون اوار کثیر الجہتی فورم تیا کمکاری نا مون آ دننگ کن سنبرینگوک اُن۔ اوپارے کہ ترکمانستان نا وزیر خارجہ ءِ بھارت نا غیرکانودی کوزہ ٹی جموں وکشمیر نا حالیت آتیان ہم معلومدار کرین۔ داوخت آ ترکمانستان نا وزیرخارجہ راشد میر دووف پارے کہ پاکستان ننا خڑک انا سنگت و ایلم ملک ءِ، مہمانداری آ نائب وزیراعظم محمد اسحاق ڈار و حکومت پاکستان نا منت واراُٹ۔ اوپارے کہ پاکستانی ہم منصب تون چندی باندات آتیا سرجمی اٹ گپ وتران مس۔ نن ہڑتوم آ کنڈآتا تعلقداری نا غٹ پلوآتا جاچ ءِ ہلکن۔ ترکمانستان نا وزیرخارجہ پارے کہ پاکستان تون سائنس اینڈ ٹیکنالوجی نا بشخ اٹی کمکاری نا وارخواہی تیاہم گپ وتران مس و نن تاپی گیس پائپ لائن ڈٹ آ پیش رفت آ ہم جاچ ءِ ہلکن۔