کوئٹہ۔ 28 فروری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ روچہ مبارک ریلیف پیکج کن 7 ارب 49 کروڑ روپئی منظور کننگانے دا زر بھاز کم ءُ، دافتے 50 ارب آن زیات کننگے تانکہ ملک انا طول وعرض اٹی المی آ گڑاتا وافر کچ اٹی دستیاب مرے ، کنوئی آ تیل ، سی، بورہ، برنج، پاڷ، بیسن، صابون، چاہ، دال، شربت و پچ سلنگ نا پوڈر آتا نہاد آتیٹی بطور خاص دمدستی کمتی اتنگے روچہ مبارک اٹی دا غٹ المی آ گڑاتا نہاد آتیٹی خاطرخواہ کمتی کننگے تانکہ کبینی ٹی تموک الس ءِ ریلیف تننگ مرے۔ داڑے جاری مروک اسہ بیان اسے ٹی سینیٹر محمد عبدالقادر پارے کہ صوبہ بلوچستان نا الس کن بطور خاص ریلیف پیکج آتا دمدستی بست وبند ءِ کننگے تانکہ بھاز کم کٹیا والا مخلوق ءِ روچہ مبارک نا بابر کت تُوا ٹی مشکل آتیان بچفنگ مرے، بلوچستان نا ہمو علاقہ غاتیٹی ہراڑے یوٹیلیٹی اسٹورز کارپوریشن نا ہند جوڑ کننگ متنے ہموڑے موبائل اسٹور تا بست وبند ءِ کننگ مرے، بلوچستان نا مرمر انگا علاقہ غاتیٹی کنوئی آ گڑاتا فراوانی یقینا اسہ مشکل ءُ کاریم اسے ولے تینا الس کن آسانی ودی کننگ کن حکومتی انتظامی پنجر ءِ مربوط کننگے۔ اوپارے کہ داوخت آ ملک اٹی یوٹیلیٹی اسٹورز کارپوریشن نا 5939 برانچ ساڑی ءُ ہرا 25 کروڑ مخلوق نا ملک انا حساب آن بھاز کم ءُ غٹ آن کم برانچ آک صوبہ بلوچستان اٹی ملنگانے صوبہ بلوچستان پاکستان نا رقبہ نا اعتبار اٹ غٹ آن بھلا صوبہ ءِ دا صوبہ نا رہینگوک آتا ذرائع آمدنی بھاز محدود ءِ چنانچہ بلوچستان نا الس کن خصوصی روچہ بازار تا اڈتننگ و خصوصی یوٹیلیٹی اسٹورتیا ریلیف پیکج آتا بست وبند ءِ کننگے تانکہ مفلوک الحال الس ءِ راشن نا دوئی کننگ کن تینا عزت نفس ءِ مجروح کروئی تمپ۔ چیئرمین قائمہ کمیٹی پارے کہ ریلیف پیکج آتا حکومتی کہول آ چاروکی ءِ کننگے تانکہ آب اٹ کنوئی آ گڑاتا فراوانی ءِ پک کننگ مرے و دا غٹ المی آ گڑاتے دُز درگہ غان دوکاندار آتے بہا کننگپ، خصوصی موبائل ویجیلینس ٹیم ٹہیفنگے تانکہ بدانتظامی و وڈی خوری نا گمان ودی مننگ کپ گڑاس وخت خننگانے کہ بے آب اٹ اجناس درآمد کرسا دا یوٹیلیٹی اسٹورتیا تخنگک ضرورت مند بندغ آک اوفتے ہلسا کاریم اٹ اتیرہ تو اوفتا پیسہ ہم برباد مریک و جان جوری ہم حکومت ءِ داہیت ءِ پک کروئی مریک کہ ہچ ءُ کہول اسے آ لاپرواہی کننگپ۔
