اسلام آباد۔ 21 اپریل (اے پی پی) وزیراعظم محمد شہباز شریف سویلی وزیرستان اٹی انسداد پولیو مہم نا ٹیم انا رکھ آ سلوک پولیس کارندہ غاتیا دہشت گرد آتا جلہو نا ترندی اٹ مذمت ءِ کرسا پارینے کہ پولیو تور مہم نا کارندہ غاتیا و اوفتا رکھ آ سلوک کارندہ غاتیا جلہو کروک آدہشت گرد آک انسانیت و قوم انا دشمن ءُ، پولیو نا برخلاف مہم برجاسلک۔ دوشنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم واقعہ ٹی کانسٹیبل نا شہیدی آ است ہسونی نا درشانی ءِ کرسا شہید کانسٹیبل کن بخشش و خاہوت آتیکن صبر وجمیل نا دعاکرے۔ وزیراعظم ٹھپی تے دمدستی طبی امداد فراوان کننگ نا پارت کرے۔ وزیراعظم پارے کہ انسداد پولیو مہم نا کارندہ غاتیا و اوفتا رکھ آ سلوک کارندہ غاتیا جلہو کروک دہشت گرد آک انسانیت و قوم انا دشمن ءُ۔ کودک شاری تا جون ومال ءِ نسخان تروک انسانیت نا دشمن دہشت گرد آتے اوفتے اوفتا کروک نا سزاتننگک۔ وزیراعظم الس آن خواست کرے کہ دازموار آتا زور اٹی بفس۔ پولیو نا برخلاف مہم ءِ برجاتخنگک۔ وزیراعظم پارے کہ حکومت پاکستان و کانود نافذ کروک آ ادارہ غا ک ملک آن دہشت گردی نا عفریت ءِ ماس آن چٹفنگ کن دے و نن خواری کننگ ءُ۔
