اسلام آباد۔ 21 اپریل (اے پی پی) وزیراعظم محمد شہباز شریف ورمن کیتھولک چرچ انا پیشوا پوپ فرانسس نا کزیت آ است ہسونی نا درشانی ءِ کرسا پارینے کہ آنجہانی پوپ فرانسس بین المذہبی ہم گرنچی، امن وانسانیت نا مون آ دننگ نا علمبردار ئس۔ دوشنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم پارے کہ پاپائے روم ارب آ انسان تے جُوانی نا ترغیب ، امن وسلامتی کن راہشونی فراوان کرساکرے۔ وزیراعظم پارے کہ آنجہانی پوپ فرانسس بین المذہبی ہم گرنچی، امن و انسانیت نا مون آ دننگ نا علمبردارئس، اونا کماشی ٹی کیتھولک چرچ مچ آدنیاٹی مہرومریبت، سگ و تین پہ تینی شرف ناکلہو ءِ لس کرے، پوپ فرانسس نا طرز ءِ عمل نئے بیرہ مسیحی دنیا کن ، بلکن ایلو مذہب آتا منوک آتیکن کسر نا ڈیوائس۔ وزیراعظم پارے کہ پوپ فرانسس نا تدوک آ دے ایسٹر نا وخت آ غزہ وفلسطین اٹی دمدستی جنگ بندی و انسانی حق انا لتاڑنگ ءِ توننگ نا بیان اونا پرامن وانسانیت نا مہرومریبت آن پبی شخصیت نا ڈیک ءِ۔ پوپ فرانسس نا کزیت مچ آ دنیاخاص کر مسیحی برادری کن اسہ بے بدل ءُ نسخان اسے۔ وزیراعظم پارے کہ ای حکومت پاکستان و پاکستانی الس نا کنڈآن ویٹی کن سٹی، جہانی مسیحی برادری و مچ آ دنیا ٹی اونا چاہوک آتون ہمدردی و ہڑزخواہی نا درشانی ءِ کیوہ۔
