کوئٹہ۔ 28 فروری (اے پی پی)پاکستان مسلم لیگ (ن) نا مرکزی سینئر راہشون چوہدری نعیم کریم پاکستان مسلم لیگ (ن) نا سینئر نائب صدر ، چیف آرگنائزر و اولیکو پوسکن گچین مروک آ زالبول وزیراعلیٰ پنجاب مریم نواز ءِ سوغند ہرفنگ و منصب ءِ سنبھالنگ آمبارکبادی پیش کرساپارینے کہ مریم نواز تینا بڑزکو لائخی تے اٹ ملکی شونداری ٹی اہم کڑد ادا کیک۔ داڑے جاری مروک اسہ بیان اسے ٹی چوہدری نعیم کریم پارینے کہ پاکستان نا تاریخ اٹ اولیکو وار اسہ زالبول اس اسہ صوبہ نا وزیراعلیٰ گچین مسنے ہرانا سہرا مسلم لیگ (ن) نا قائد میاں محمد نواز شریف و پارٹی نا مرکزی صدر میاں محمد شہباز شریف ءِ کاہک۔ اوپارے کہ پوسکن گچین مروک آ وزیراعلیٰ پنجاب مریم نواز پارٹی قائد میاں محمد نواز شریف و پاکستان مسلم لیگ (ن) نامرکزی صدر میاں محمد شہباز شریف نا نیمہ غا سلوک مشن ءِ پورو کننگ کن غٹ وسیلہ و توانائی تے کاریم اٹ اتیک۔ اوپارےکہ پوسکن گچین مروک آ وزیراعلیٰ مریم نواز تینا اسمبلی آن اولیکو تران اٹی پنجاب حکومت نا اولیت آتا پڑو ءِ کرینے ہراڑآ عملدرآمد کرسا او صوبہ ءِ شونداری و شونہالی نا کنڈآ دیک۔
