سندھ انا پوسکن گچین مروک آ وزیراعلیٰ سید مراد علی شاہ تینا فرض ءِ منصبی نا بناءِ کرے، وزیراعلیٰ ہاؤس آ بننگ آ گارڈ آف آنر پیش کننگا

کراچی۔ 28 فروری (اے پی پی) پوسکن گچین مروک آ وزیراعلیٰ سندھ سید مراد علی شاہ ءِ چارشنبے نا سہب اتون وزیراعلیٰ ہاؤس آ بننگ آ گارڈ آف آنر پیش کننگا۔ ترجمان وزیراعلیٰ سندھ انا رداٹ دا وخت آ چیف سیکرٹری ڈاکٹر فخر عالم، آئی جی پولیس رفعت مختار، صوبائی سیکرٹریز و ایلوبڑزکو آفیسر آک ساڑی ئسر۔ پوسکن گچین مروک آ وزیراعلیٰ ءِ پولیس نا چاق و چوبند دستہ سلامی پیش کرے۔ وزیراعلیٰ سندھ سید مراد علی شاہ سلامی ہلنگ آن پد تینا فرض ءِ منصبی  نا بناءِ کرے۔ وزیراعلیٰ سندھ سلامی آن پد چیف سیکرٹری ڈاکٹر فخرعالم، آئی جی سندھ رفعت مختار آن جتا جتا اوڑدہی کرے۔ اوکان پد امن و ایمنی نا اولیکو دیوان نا کماشی ءِ ہم کرے۔ سید مراد علی شاہ سہب انا 7:45آ وزیراعلیٰ ہاؤس آ سرمس۔