اقوام متحدہ ۔ 14 فروری (اے پی پی) پاکستان ملک اٹی دِیر انا کاختی نا ودوک آ تنکی نا مون ءِ توننگ نا گرج آ زور شاغانے و 1960نا سندھ طاس معاہدہ (آئی ڈبلیو ٹی) آ سختی اٹ عملدرآمد نا خواست کرینے۔ دا معاہدہ جہانی بینک انا کمک اٹ بھارت وپاکستان نا نیام اٹ دیر انا بشخنگ کن مسوسس۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا سلامتی کونسل اٹی جہانی امن و سلامتی آ چاگڑدی بدلی تا اثر و خور انا بے رکھی آ مروک آ بڑزکو کہول انا شرہ ٹی پارے کہ چاگڑدی بدلی تا اثرآتون دِیر انا ودوک آ طلب دنیا نا چندی بشخ آتیٹی سیم پار آبی جھیڑہ غاتا گمان ودی کیک۔ اوزور شاغا کہ پاکستان سندھ طاس معاہدہ غا سختی اٹ عملدرآمد ءِبڑزکو اولیت ایتک۔ دا شرہ فروری کن سلامتی کونسل نا کماشی ءِ کروک آملک گیانا اڈتس۔ ہراٹی کم و ود 90 ملک بشخ ہلکر۔ پاکستانی مندوب پارے کہ پاکستان نا مسخت دریائے سندھ انا طاس ءِ دُوارہ متحرک کننگ ءِ ہرا دنیا نا غٹ آن بھلا مربوط آبپاشی نا نظام ءِ، ہرا 10 کروڑ 50 لکھ (255 ملین) آن زیات مخلوق ءِ غذائی رکھ فراوان کیک۔ منیر اکرم 15 باسکی کونسل ءِ پارے کہ دا مسخت کن، پاکستان کثیر جہتی لیونگ انڈس ڈٹ آتا بناءِ کرینے۔ اوپارے کہ دِیر آ جھیڑہ ریاستی، ذیلی قومی و ہندی کمیونٹی نا کہول آتیا ودنگ ءِ، اوپارے کہ کشت وکشار و ساہدار تا چراگاہ خاص وڑٹ غٹ صحارا و نیامی افریقہ ٹی دہشت گرد رڑوکسبی ڈوہدار بندغ آتا کمک اٹ مسابقتی دعویٰ تا استحصال ءِ کننگ انگ ءِ۔
