لاہور۔ 14 فروری (اے پی پی) نگران بنجائی وزیر مذہبی امور و بین المذاہب ہم آہنگی انیق احمد پارینے کہ برجاسال انا حج پاکستانی حاجی تیکن آسراتی تا اعتبار اٹ بے مٹ ءُ حج اس مریک، ملکی تاریخ اٹی اولیکو وار پاکستان اٹی گونڈ مدتی حج انا آسراتی تسونن، حج انا وخت آ غٹ زالبول آتے پاکستانی بیرک والا عبایا مفت تننگک۔ داخیال آتا درشانی ءِ او چارشنبے نادے آ داڑے دارالحجاج حاجی کیمپ اٹی حاجی تا ہیلکاری سیشن نا بنانا وخت آ تران کرساکرے۔ داوخت آ ہیلکاری سیشن اٹ ڈائریکٹر حج لاہور اقراراحمد، ڈپٹی ڈائریکٹر وزارت مذہبی امور عبدالحکیم خٹک، ڈپٹی ڈائریکٹر عارف ظہور، ڈپٹی اسسٹنٹ ڈائریکٹر مجیب اکبر شاہ و طاہر لطیف و ایلوفک ہم ساڑی ئسر۔ نگران بنجائی وزیر انیق احمد پارے کہ حج تینے آن خدااسکان نا سفر نا پن ءِ، حاجی اللہ نا مہمان ءُ و نناہم، شفاف نظام نا رداٹ درخواست گزارتیان قرعہ اندازی نا کمک اٹ خوش نصیب حاجی تا گچینی ءِ کننگانے۔ ہرافتا تربیت نا بنا 12 فروری آن مسنے۔ اوپارے کہ ہراتم ای وزارت نا قلمدان ءِ سنبھالاٹ تو غٹ آ پیدوار کریسٹ کہ سال 2024 اٹی پاکستانی حاجی تے گچین آسراتی فراوان کینہ، انشاءاللہ برجاسال انا حج پاکستانی تیکن اسہ مثالی ءُ حج اس مریک۔
