کوئٹہ۔ 14 فروری (اے پی پی) چیئرمین اسٹیڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی پارینے کہ ملک اسہ بھلو وخت اسے آن بے یقینی نا حالیت آتا گواچی ءِ، پاننگاکہ ملک اٹی لس گچین کاری مریرہ تو مچ آ ملک آن غیریقینی نا کیفیت چٹک، ہندن لگاکہ کہ غیر یقینی نا حالیت آتا پد اٹ گچین کاری تا وخت آ اڈتفننگ ءِ، ولے گچین کاری تیان پد غیر یقینی نا حالیت آتا برجاسلنگ آن دا معلوم مس کہ دا کیفیت نا پین ہم چندی سوب آک ءُ، اوپارے کہ انتظامی باندات آتیا حکومت نا گرفت سوگو مفننگ و امور حکومت ءِ گچین وڑاٹ چلیفپننگ نا سوب آن چندی تپہ غاتا سراپا برانز مریک۔ آئین اٹ ملک ان اغٹ شاری تا بنداوی انسانی حق انا رکھ ءِ فراوان کننگانے، دا آئینی رکھ آن پد ہم اگہ حکمران تینا آئینی زمواری تے پورو کننگ اٹ بے سہب مریک تو الس تینا حق انا خاطر برانز کیک، ہندا کل داوخت آ بلوچستان اٹی مننگ ءِ ہراڑے گچین کاری تیٹی بروک آ نتیجہ غاتیا سراپابرانز ءِ، اوپارے کہ کوئٹہ ٹی مچی کروک آ ک غٹ اہم شاہراہ تے بند کرینو و او سڑک آتے بلاک کرسا ہرجاگہ غا دھرنا تسنو توسنو، گچین کاری تیان پد بلوچستان اٹی گڑاس حلقہ غاتا نتیجہ ناقابل فہم سوب آتا بناء آ تاخیر نا گواچی مس تو مخلوق نا صبر انا پیمانہ لبریز مس۔ داوڑنا واقعہ گڑاس وخت قومی سانحہ غاتیٹی بدل مریک، الیکشن کمیشن نا زمواری ءِ کہ او پرامن و شفاف گچین کاری تے اڈایتے ہرا قومی و جہانی کہول آ قابل قبول مریر تانکہ پاکستان نا وقار بڑز مرے و اونا ساکھ آ ہچ وڑنا سوج انا نشان اس مف۔ چیئرمین قائمہ کمیٹی مستی پارے کہ بلوچستان خاص وڑاٹ کوئٹہ ٹی مروک آ برانز مچ آ صوبہ ٹی بے حد مشکل آتا سوب مننگ ءِ، بلوچستان چونکہ پاکستان نا رقبہ نا اعتبار اٹ غٹ آن بھلا صوبہ ءِ ہنداسوب آن اونا انتظام و انصرام ءِ سنبھالنگ ایلو صوبہ غاتا نسبت زیات مشکل ءِ۔
