اسلام آباد۔ 30 اگست (اے پی پی) صدر مملکت ڈاکٹر عارف علوی نا اُرائی بیگم ثمینہ عارف علوی مر مر انگا علاقہ غاتیٹی زالبول آتے سینہ نا کینسر نا زوت تشخیص کن منشاکارانہ وڑاٹ تینا معائنہ ءِ تینٹ کننگ نا ترغیب تننگ کن آگاہی مہم ءِ مون آ دننگ اٹ میڈیا نا کمک ناستاءِ کرے۔ چارشنبے نادے آ تینا اسہ انٹرویو اسے ٹی اوخاص وڑاٹ ملک انا مر مر انگا علاقہ غاتیٹی زالبول و مسن تے بریسٹ کینسر نا نشانی، تینٹ جاچ، تشخیص و درمان نا واکداری تا بارواٹی حساس کننگ کن پرنٹ، الیکٹرانک و سوشل میڈیا نا کمک اٹ پدریسہ السی آگاہی مہم اس چلیفنگ نا گرج آ زور شاغا۔ اومستی پارے کہ پاکستان اٹ زالبول آتیٹی سینہ نا کینسر نا تشخیص و درمان نا بارواٹی جوان آگاہی نا کمتی ءِ ہرانا سوب آن کثیر الجہتی اڑاند آک ءُ، ولے داسہ زالبول بھاز زیات پراعتماد ءُ و بنائی ریسہ غاتیٹی ڈاکٹر آتون رجوع کیرہ۔ اوداہیت آ زور شاغا کہ خلقی آ علاقہ غاتیٹی دوئی جان جوڑی نا آسراتی تسکان زالبول آتا رسینگ اٹ اڑاند جوڑ مروک راجی، نفسیاتی و دودوربیدگی عوامل آتیا ہم چکار کننگے۔ اسہ سوج اسے نا ورندی ٹی اوپارے کہ پاکستان نا مرمر انگا علاقہ غاتیٹی زالبول آگاہی مہم تیٹی بنداوی ہدف مرے۔ اوفتے سینہ نا کینسر اٹ اختہ مننگ نا زیات خطرہ مریک انتئے کہ او آگاہی نا کمتی نا سوب آن نشانی تے گوجالرہ و ہراناجوڑی نا تالانی نا سوب مریرہ و خطرناک ثابت مننگ کیرہ۔
