اسلام آباد۔ 30 اگست (اے پی پی) صدر مملکت ڈاکٹر عارف علوی ورناتے پوسکن آ ٹیکنالوجی نا کسب آن شپ کننگ نا گرج آ زور شاغسا پارینے کہ پاکستان نا زرگزرانی شونداری ملک اٹی انفارمیشن ٹیکنالوجی نا شونداری تون گنڈوک ءِ، پاکستان دنیا نا ارٹ میکو غٹ آن بھلا فی لانس مارکیٹ جوڑ مسنے، مالیاتی لین دین ءِ گچین کننگ آن ملکی زرگزران ءِ پین مون آ دننگ مریک، و دانا نتیجہ ٹی ملک انا جی ڈی پی ٹی 2 آن 3 درسد ودکی مننگ کیک، ورناتے آئی ٹی نا تعلیم و تکنیکی مہارت نا کنڈآ راغب کننگ تون اوار اوار طالب علم آتے مصنوعی ذہانت آن لیس کروئی مریک۔ داخیال آتا درشانی ءِ او چارشنبے نادے آ داڑے ایوان صدر اٹی ہواوے آئی سی ٹی مقابلہ 2022-23نا ایسری دود آن تران کرسا کرے۔ دود اٹی نگراں بنجائی وزیر انفارمیشن ٹیکنالوجی و سائنس و ٹیکنالوجی ڈاکٹر عمر سیف، ہواوے نا مڈل ایسٹ ریجن نا صدر وانگ شون لی، سفارتکار، ماہرین تعلیم و آئی ٹی نا بشخ اتون وابستہ نمان شخصیت آک بشخ ہلکر۔ صدر پارے کہ یونیورسٹی تے گریجویٹس نا تربیت و اوفتے مارکیٹ نا گرج انا رداٹ تیار کننگ کن تینا کیمپس آتیٹی اوفتا کاریم نا کچ ءِ ودفنگ کن ہیلکاری کیمپ آتا بست وبند ءِ کے۔ اویونیورسٹی تیا زور شاغا کہ او طالب علم آتیکن اِراسال انا انڈرگریجویٹ ایسوسی ایٹ ڈگری پروگرام نا بناءِ کیر انتئے کہ مچ آ دنیا ٹی ودوک آ ٹیکنالوجی ءِ ڈگری تا آخا بلکن مہارت آتا طلب ءِ۔ صدر مملکت پارے کہ انفارمیشن ٹیکنالوجی نا بشخ وخت انا اہم خواست جوڑ مسنے، دنیا نا مقابلہ ءِ کننگ کن دمدستی فیصلہ سازی نا گرج ءِ۔
