انقرہ، دمشق۔ 06 فروری (اے پی پی) ترکی و شام اٹی 7.8 شدت نا زمی جمب آن 100 آن زیات بندغ زوال کریر۔ فرانسیسی خبررساں ادارہ نا رداٹ ترکیہ ٹی ایمرجنسی سروس نا کارندہ غاک پاریر کہ ترکیہ نا سویل دے ٹکی علاقہ غاتیٹی دوشنبے ناسہب اتون زمی جمب نا ترند ءُ لوڈو محسوس کننگا ہرافتا شدت ریکٹر اسکیل آ 7.8 ریکارڈ کننگا ہرانا نتیجہ ٹی 10 صوبہ غاتیٹی 76 بندغ زوال و 440 ٹھپی مسنو۔ زمی جمب نا مرکز صوبہ کہرامان مراش نا ضلع پزار جک اٹی 7 کلومیٹر نا گہرائی ٹی ئسک۔ ترکی نا چندی علاقہ غاتیٹی زمی جمب آن پد نیم گھنٹہ اسکان آفٹرشاک ہم محسوس کننگا و چندی ماڑیک توسر۔ شام انا سرکاری میڈیا و اسہ ہندی ہسپتال اسے نا رداٹ شام اٹی ہم 7.8 شدت نا زمی جمب آن کم از کم 50 بندغ زوال کریر۔ شام انا ہندی میڈیا نا پاننگ ءِ کہ دیارباقرشا راٹی اسہ ماڑی اسے نا توننگ آن پد 200 آن زیات بندغ ماڑی نا کیرغ اختہ ءُ ہرافتے کشنگ نا کوشست برجاءِ۔ یات سلے دا زمی جمب کم از کم اسہ صدی ٹی دا ڈیہہ ٹی بروک آ غٹ آن زیات واکدار زمی جمب آتیان اسٹ ئسک ہرا سویلی ترکیہ تون اوار اوار ہمسایہ ملک شام انا بھلا شارتیٹی چندی ماڑی تے کیرغ کرے و لکھ آ بندغ آتے بے اُرا کرینے۔
