اقوام متحدہ۔30جنوری (اے پی پی) اقوام متحدہ نا ورلڈ فوڈ پروگرام خبڑدار کرینے کہ شام اٹی خور انا کمتی ریکارڈ کچ آٹی ءِ۔ سعودی میڈیا نا رداٹ ڈبلیو ایف پی تینا بیان اٹی پارے کہ شام اٹی برجا جھیڑہ 29 لکھ بندغ آتے خور انا کمتی نا سوب آن بین آن کہینگ نا خطرہ غاتا گواچی کرینے۔ دا جھیڑہ آخبت کن زرگزرانی تنکی ءِ ودی کرسا اہم بنداوی پنجر ءِ ہم نسخان تسنے۔ بیان اٹی پاننگانے کہ شام اٹی بین اٹی ودکی نا کچ 12 سال انا بڑزکوانگا کچ آ سرمسنے و داڑے ساڑی کم و ود 12 ملین بندغ داچارہ کہ اوفتے کن آخبت خور انا بست وبند ہراکان و امر مریک۔ ڈبلیو ایف پی پارے کہ تدوک آ 3 سال اٹی ملک اٹی کنوئی آ گڑاتا نہاد آتیٹی کم و ود 12 ہنداخہ ودکی مسنے ہرانا سوب آن شام داسہ دنیا ٹی خور انا بے رکھی نا گواچی بندغ آتا لڑاٹی ششمیکو نمبر آ بسنے۔ ملک اٹی اسہ دہائی آن زیات وخت آن برجا جنگی حالیت آتیٹی لمہ و چناڑ کن ہم غذائی کاختی ہمورفتار اٹ ودنگ ءِ ہرا مہالو اسُل خننگتنے۔ یواین نا ورلڈ فوڈ پروگرام نا ایگزیکٹیو ڈائریکٹر ڈیوڈ بیسلی تدوک آ ہفتہ شام انا دورہ ٹی پارے کہ اگہ جہانی برادری شام انا الس نا کمک کن مثبت ءُ گام گیج اس کپک تو اودے بھلو کچ اسے آ ہمپنگ نا اسہ پین ریسہ سے تون مون تروئی تمک۔ اوجہانی برادری و عطیہ تروک آتیا زور شاغساپارے کہ شام اٹی بروک آ دے تیٹی پین ویل آتے توننگ کن کوشست آتے زیات کننگ نا گرج ءِ۔ اقوام متحدہ نا ادارہ نا کساس نا رداٹ شسام اٹی 18 ملین بندغ آتیان 90 درسد نیزگاری نا زند ءِ تیر کننگ اٹی ءُ۔ شام انا زرگزران زہمی مننگ اٹ جھیڑہ غاتیان بیدس خشک سالی، دست و کوویڈ۔ 19 تون اوار اوار ہمسایہ ملک لبنان اٹی مالیاتی تنکی ہم اوار ءِ
