اقوام متحدہ ۔ 27 جنوری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ اقوام متحدہ نا سلامتی کونسل کشمیری و فلسطینی تے حق خودارادیت نا کاریم اٹ اتنگ نا قابل جوڑ کے۔ اوسلامتی کونسل اٹی نمائندہ غاتیان تران کرسا پارے کہ مخلوق دا جہانی نظام نا بنداو ءِ ہرانا تصور ءِ اقوام متحدہ نا چارٹر اٹی کننگانے۔ اوپارے کہ دُن تو اقوام متحدہ نا 193 باسک ملک آتیان زیات تر ملک آک تینا حق خودارادیت ءِ کاریم اٹ ایسونو، ولے بھاز انگاک ہندن ءُ ہرافک درملکی کوزہ و جور انا سوب آن دا حق انا کاریم اٹ اتنگ آن توننگانو۔ اوپارے کہ دافتیان ارٹ کونسل نا ایجنڈا ٹی غٹ آن زیات پیچیدہ جھیڑہ فلسطین و جموں و کشمیر ءُ ہراڑے الس نا حق ءِ خودارادیت ءِ توننگ انگ ءِ ہرا جہانی امن و سلامتی ءِ خطرہ ٹی شاغنگ اٹی ءُ۔ اوزور شاغا کہ فسلطین و جموں وکشمیر نا الس ءِ تینا حق خودارادیت نا کاریم اٹ اتنگ نا قابل جوڑ کننگ سلامتی کونسل نا بایدے اولیت مرے۔ اوپارے کہ ننا دنیا 70 سال مست انا نسبت بھاز زیات ہزگار ءِ، اوکان پد ہم بے بریبری ٹی ودکی مسنے و ہزگار و نیزگار نا نیام اٹ بشخنگ ودنگ ءِ۔ اودا ہیت آ زور شاغسا پارے کہ سوگو امن کن سوگو شونداری نا گرج ءِ و موسمیاتی ایجنڈا ءِ دوئی کننگ ءِ۔ پائیدار امن اسکان سرمننگ کن چاگڑدی انصاف نا گرج ءِ۔
