ریاض۔ 19 جنوری (اے پی پی) سعودی عرب نا وزیر خارجہ شہزادہ فیصل بن فرحان پارینے کہ یمن جنگ انا چٹفنگ نا کنڈا پیش رفت مننگ اٹی ءِ، ولے داسکان پین کاریم کننگ نا گرج ءِ۔ سعودی خبررساں ادارہ نا رداٹ او ورلڈ اکنامک فورم اٹی اسہ پینل اسے آن تران کرسا پارے کہ ہشت سال آن برجا جھیڑہ بیرہ سیاسی تصفیہ نا کمک اٹ ہی ایسر مریک۔ اوپارے کہ یمن جنگ انا چٹفنگ نا کنڈا پیش رفت مننگ اٹی ءِ، ہراٹی جنگ بندی ٹی ودکی و آخبتی جنگ بندی نا کنڈا پیش رفت اوار ءِ۔ اواسرائیل نا پوسکن آ حکومت آ ہم زور شاغا کہ اوفلسطین نا جھیڑہ نا ایسری کن سنجیدگی اٹ کاریم کے۔ اوپارے کہ اسرائیل نا گڑاس گام گیج سازگار چاگڑد اس ودی کننگ نا جاگہ غا جھیڑہ ٹی شدت ودی کننگ اٹی ءُ۔ اواومیت ظاہر کرے کہ جھیڑہ نا ایسر اسرائیل و گیشتر ڈیہہ نا فائدہ ٹی مریک۔ یات سلے اسرائیلی وزیراعظم بنیامین نیتن یاہو 2020اٹی متحدہ عرب امارات و بحرین تون معمول ناتعلقداری استوار کننگ کن امن معاہدہ طے کریسس۔
