اقوام متحدہ۔ 13 جنوری (اے پی پی) پاکستان کشمیر و فلسطین نا الس کن اقوام متحدہ نا سلامتی کونسل نا قرارداد آتا رداٹ حق خودارادیت آ عملدرآمد نا خواست کرسا پارینے کہ اقوام متحدہ نا سلامتی کونسل نا قرارداد آتیا عملدرآمد آن جہانی امن وسلامتی ءِ مون آ دننگک۔ اقوام متحدہ ٹی پاکستان نا آخبتی مندوب منیر اکرم اقوام متحدہ نا 15 باسکی سلامتی کونسل اٹی”اقوام تا نیام اٹ کانود نا حکمرانی” آ شرہ ٹی پارے کہ سلامتی کونسل ءِ جھیڑہ و بے چیٹی تیا خاموشی اختیار کننگ نا جاگہ غا اوفتا فعال وڑاٹ ایسری ءِ مون آ دننگ نا گرج ءِ۔ اوپارے کہ سلامتی کونسل فلسطین و جموں وکشمیر نا بابت تینا قرارداد آتیا پدریسہ عملدرآمد کرفنگ اٹ بے سہب مسنے۔ اوپارے کہ فلسطین و جموں وکشمیر اٹی الس نا حق خودارادیت ءِ بے دردی اٹ توننگا و کیہی دہائی تیان درملکی کوزہ ءِ برقرار تخنگ کن ہلنگا۔ اوپارے کہ داوڑوڈول آتے ساڑی رداٹ آخبتی وڑاٹ پیدوار کننگ المی ءِ ہرافتا کمک اٹ دا اصول ءِ جہانی کہول آ نافذ کننگ مریک۔ اوپیدوار کرے کہ جہانی برادری طاقت، خاص وڑاٹ فوجی طاقت نا کاریم اٹ اتنگ ءِ منظم کننگ کن کانود اس تینا کرینے حالانکہ چارٹر دفاع نا باندات آتیان بیدس الس آ طاقت نا کاریم اٹ اتنگ آ پیدوار پابندی خلکنے۔ چارٹر ہندن ءُ اصول شین تسنے ہرا تدوک آ ہفت دہائی ٹی جہانی نظم و ضبط ءِ برقرار تخنگ و ارٹ میکوجہانی جنگ ءِ توننگ کن اسہ بنداو اس فراوان کننگ ءِ۔ پاکستانی مندوب منیر اکرم پارے کہ سلامتی کونسل نا قراردادآک خواہ بحرالکاہل نا جھیڑہ غاتا پرامن ایسری آ اقوام متحدہ نا چارٹر نا بشخ VIیا VIIہراٹی نفاذ نا کارروائی اوار ءِ نا رداٹ منظور کننگا و باسک ملک آک چارٹر ناآرٹیکل 25 نا رداٹ کونسل نا فیصلہ غاتیا کانودی وڑاٹ عملدرآمد کننگ نا پابند ءِ۔ اوپارے کہ اقوام متحدہ نا سیکرٹری جنرل ءِ چارٹر نا آرٹیکل 99 نا رداٹ جہانی امن و سلامتی ءِ مون تروک خطرہ غاتے توننگ کن تینا اختیار ءِ کاریم اٹ اتے۔ جھیڑہ نا اسہ فریق اس ہم سیکرٹری جنرل نا ثالثی و جہانی عدالت انصاف نا وڑوڈول آتیان انکار کننگ کپک۔ اوپارے کہ جہانی امن و جہانی سلامتی نا پنجر ءِ بھاز خطرہ مون تروک ءِ و کیہی ویل آتے داوڑوڈول آتے اٹ ایسر کننگ نا گرج ءِ ہرافتے ٹی اقوام متحدہ نا چارٹر نا بنداوی اصول آتیکن ہمہ گیر و آخبتی شرف ءِ مون آ دننگ، جھیڑہ و جھیڑہ غاتا بنداوی سوب آتون مون تننگ ہرا گیشتر کونسل ءِ ژند کیک۔ سلہہ غاتا ودوک آ رُمب اتون اوار پوسکن آ سلہہ و ڈومینز آتے توننگ، جہانی امن و سلامتی نا پائیدار پنجر نا تفنگ کن اقوام متحدہ و اونا ادارہ غاتے واکدار کننگ و پورو وڑاٹ کاریم اٹ اتنگ اوار ءِ۔
