پاکستان ازبکستان تون ہڑتوم آ کنڈآتا تعلقداری تا مون آ دننگ کن سنبرینگوک ءِ، وزیراعظم شہباز شریف نا ازبک نائب وزیراعظم نا کماشی ٹی ڈل اتون اوڑدہی ٹی گپ وتران

اسلام آباد۔ 27 دسمبر (اے پی پی) وزیراعظم محمد شہباز شریف ازبکستان تون ہڑتوم آ کنڈآتا تعلقداری تا مون آ دننگ کن پاکستان نا عزم انا درشانی ءِ کرسا پارینے کہ ڈیہہ ٹی رابطہ غاتا ڈٹ آتیان نئے بیرہ واپاری کمیونٹی تے خڑک اتنگ اٹی کمک رسینگک بلکن داڑان ہڑتوم آ ملک  وڈیہہ ٹی امن و شونہالی نا پوسکن آ دور انا ہم بنامریک۔ وزیراعظم محمد شہباز شریف دا ہیت ءِ سے شنبے نادے آ داڑے ازبکستان نا نائب وزیراعظم، وزیر زرکاری و پیشن نا واپار خودجائیوف جمشید عبدو حکیموف نا کماشی ٹی ازبکستان نا ڈل اتون اوڑدہی ٹی گپ وتران کرسا پارے۔ تدوک آ ستمبر اٹی سمرقند اٹی شنگھائی کمکار تنظیم نا سروکی دیوان و ایشیاٹی رابطہ و پت سازی آ تالان گام گیج آتیا اکتوبر 2022 اٹی قزاخستان اٹی مروک آ شش میکو سروکی دیوان نا وخت آ ازبکستان نا صدر شوکت مرزائیوف تون تینا اوڑدہی تا حوالہ ءِ ترسا وزیراعظم پاکستان نا کنڈآن ہڑتوم آ برادر ملک آتا نیام اٹ بے مٹ دوستانہ تعلقداری تے پین مون آ دننگ نا عزم انا درشانی ءِ کرے۔ وزیراعظم پارے کہ پاکستان سڑک و ریلوائی تا کمک اٹ نیامی ایشیااسکان رسینگ نا پیش کش کننگ ءِ ۔ اواومیت ظاہر کرے کہ ڈیہہ ٹی رابطہ غاتا دا ڈٹ آتیان نئے بیرہ واپاری کمیونٹی تے خڑک اتنگ اٹ کمک رسینگک بلکن داڑان ہڑتوم آ ملک و ڈیہہ ٹی امن و شونہالی نا پوسکن آ دور ہم بناکیک۔ ازبکستان نا ڈل  وزیراعظم ءِ پاکستان اٹی اقتصادیات نا وزارت آتون مروک آ اوڑدہی تا بارواٹ پارے ہراٹی ہڑتوم آ ملک آتا نیام اٹ واپار و زرگزران نا بشخ آتیٹی تعلقداری تے مون آ دننگ آ امنائی مسنے۔ ازبکستان نا نائب وزیراعظم ، وزیر زرکاری و پیشن نا واپار خودجائیوف جمشید عبدو حکیموف وزیراعظم ءِ چندی بشخ آتیٹی پاکستان وازبکستان نا پوریاگر ٹولی تا نیام اٹ مروک آ اوڑدہی و دیوان تیان ہم معلومدار کرے۔ وزیراعظم ہڑتوم آ ملک آتا بزنس کمیونٹی تا نیام اٹ واپاری رابطہ غاتا جوڑ کننگ کن بھرمی گپ وتران نا ستاءِ کرے و پارے کہ داڑان ہڑتوم آ کنڈآتا واپار و زرکاری ءِ مون آ دننگک۔ ازبکستان نا ڈل وزیراعظم نا منت واری ءِ ہرفے و ہڑتوم آ ملک آتا نیام اٹ ہڑتوم آ کنڈآتا سنگتی ءِ پین کڑمب کننگ و رابطہ غاتیٹی ودکی نا عزم انا درشانی ءِ کرے۔ وزیراعظم داہیت انا درشانی ءِ کرے کہ پاکستان و ازبکستان نا نیام اٹ سنگتی وخت تدینگ تون اوار پین سوگو مننگ ءِ و ازبکستان نا نائب وزیراعظم نا کماشی ٹی ڈل انا دورہ غان ہڑتوم آ ملک آتا نیام اٹ ودوک آ تعلقداری تا عکاسی مننگ ءِ۔