اقوام متحدہ۔ 20 دسمبر (اے پی پی) اقوام متحدہ نا سیکرٹری جنرل انتونیوگوتریس دنیا غا زور شاغانے کہ پاکستان ءِ نوکاپ نا سوب آن مروک آ بھسکاری تیان پد پوسکن تفنگ نا عمل کن جہانی برادری نا پبی امداد نا گرج ءِ۔ اونوکاپ آن زہمی ملک پاکستان اٹی پوسکن تفنگ نا کاریم تیکن امداد ءِ متحرک کننگ نا بابت جنیوا ٹی 9 جنوری آن مروک آ جہانی کانفرنس نا بابت پاکستان نا سرکاری خبررساں ایجنسی ’’اے پی پی‘‘ نا کنڈآن کروک آ اسہ سوج اسے نا ورندی ٹی پارے کہ جہانی برادری آ بھلو زمواری اس بیٹ مریک کہ او پاکستان نا کمک ءِ کے۔ پاکستان اٹی نوکاپ نا سوب آن 3 کروڑ 30 لکھ بندغ زہمی و 1700 زوال کرینو۔ سیکرٹری جنرل نیویارک اٹی اقوام متحدہ نا ہیڈ کوارٹر اٹی پریس کانفرنس اٹی پارے کہ او پاکستان نا کمک کن جہانی برادری ءِ متحرک کننگ نا بابت ہرممکن کوشست کن سنبرینگوک ءِ۔ اوپارے کہ او نوکاپ آن پد پاکستان نا دورہ ءِ کرے و نوکاپ نا سوب آن بھلو کچ اسے آ مروک آ بھسکاری اودے حیران کرے۔ اوپارے کہ پاکستان اٹی نوکاپ آن زہمی علاقہ کنا ملک پرتگال نا کل رقبہ غان ہم مسہ گنا زیات ءِ۔ اوپارے کہ سندھ و بلوچستان اٹی نوکاپ نا سوب آن فصل، ساہدار، اُرا و انسانی زند ءِ است ہسون نسخان رسینگا ہرا اسہ اسُل بھسکار حالیت اسے و اودے یخین ءِ کہ جہانی برادری نا سوگو زمواری ءِ کہ او پاکستان نا کمک ءِ کے ہرا چاگڑدی بدلی ٹی بھاز کم کڑد ادا کرینے۔ اوبروک آ جنیوا کانفرنس نا بابت پارے کہ دا کانفرنس نا مسخت ہمو وسیلہ غاتے پورو وڑاٹ متحرک کننگ ءِ ہرافتا گرج ءِ ۔ اقوام متحدہ نا سیکرٹری جنرل پارے کہ او آئی ایم ایف و ورلڈ بینک اتون ہم رابطہ ٹی ئسک و اودے اومیت ءِ کہ دا ہڑتوم آ ادارہ غاک ہم بامعنی گام گیج اس کیرہ۔
