ریاض۔ 08 دسمبر (اے پی پی) سعودی عرب و چینی کمپنیک چندی بشخ آتیٹی زرکاری نا 34 معاہدہ غاتیا دستخط کرینو۔ سعودی عرب نا سرکاری ایجنسی ایس پی اے نا خبر نا رداٹ چینی صدر شی جن پنگ نا دورہ ءِ سعودی عرب نا دنگ اٹی طے مروک آ معاہدہ غاتیا اسہ دیوان اسے ٹی دستخط کننگا ہراٹی وزیر زرکاری کالد بن عبدالعزیز الفالح و تعلقدار ریاستی ادارہ غاتا نمائندہ غاک بشخ ہلکر۔ حوال نا رداٹ ہڑتوم آ فریق آتا نیام اٹ مروک آ معاہدہ غاتیٹی چندی بشخ دُن کہ گرین انرجی، گرین ہائیڈرو جن، فوٹو وولٹک سولر انرجی، انفارمیشن ٹیکنالوجی ، کلاؤڈ سروسز، ٹرانسپورٹیشن ، لاجسٹکس ، میڈیکل انڈسٹریز، ہاؤسنگ و تعمیراتی کارخانہ غاک اوار ءُ آ دستخط کننگانے۔ دستخط نا دود آن تران کرسا وزیر زرکاری فلاح پارے کہ دا معاہدہ سعودی عرب نا چین اتون زرگزران و زرکاری تون اوار غٹ بشخ آتیٹی تعلقداری تے مون آ دننگ نا است خواہی نا عکاسی ءِ کیک۔ اوپارے کہ چین نا صدر نا دورہ ہڑتوم آ ملک آتا راہشون تا اقتصادی و زرکاری تون اوار غٹ بشخ آتیٹی تعلقداری و شریداری ءِ مون آ دننگ و سوگو کننگ نا عزم انا عکاسی ءِ کیک۔ فالح پارے کہ دا دورہ چین نا اقتصادی وواپاری تعلقداری و زرکاری نا رفتار ءِ ترند کننگ اٹ کمکار مریک۔ چینی وزارت خارجہ پڑو کرے کہ شی جن پنگ 7 آن 9 دسمبر آ سعودی عرب نا سرکاری دورہ ءِ کیک، و دارالحکومت ریاض اٹی اڈ ہلوک آ چین۔ عرب ملک آتا سروکی دیوان و چین۔ خلیجی کمکار تنظیم نا سروکی دیوان اٹی بشخ ہلیک۔
